Estudantes 99 Tuir Modular

Foto ilustrasaun

DILI, STLTIMORLESTE.com – Estudante hamutuk 99 husi Eskola Sekundária Tékniku-Vokasionál (ESTV) Kalu-Heda, iha Uatulari, Munisípiu Viqueque, prepara an atu tuir ezame modular ba III períodu.

Adjuntu ESTV Kalu-Heda, Augusto Marques hato’o informasaun ne’e ba STL liu husi telefone, Kinta (19/11/2026).

Augusto Marques esplika katak, iha III períodu ne’e, eskola tékniku-vokasionál sira uza sistema avaliasaun modular. Tanba ne’e, bainhira estudante sira remata aprende matéria ida, sira kontinua ho ezame modular tuir matéria ne’ebé aprende ona.

“Konaba ezame III períodu nian, iha eskola tékniku-vokasionál ami uza sistema modular de’it. Depois matéria ida remata, ami kontinua ho ezame modular. Ezame modular ne’e ami sei hala’o iha loron 23. Preparasaun iha eskola lao di’ak. Ami iha profesór hamutuk 17 no estudante ne’ebé sei partisipa iha ezame modular hamutuk 99,” dehan Augusto.

Nia hatutan katak, estudante 99 ne’e sei tuir ezame modular tuir disiplina ida-idak, ne’ebé profesór sira prepara. Ezame ne’e sei hala’o iha loron 23 no kontinua fali iha loron 30 fulan Novembru.

Nia mós informa katak, ESTV Kalu-Heda iha departamentu rua, mak Departamentu Jestaun Ekipamentu Informátika no Departamentu Produsaun Agrária.

“Husi ami-nia eskola, preparasaun lao di’ak. Ami iha departamentu rua de’it, mak Departamentu Jestaun Ekipamentu Informátika no Departamentu Produsaun Agrária,” nia esplika.

Iha fatin seluk, Diretór ESTV 28 de Novembro, Becora-Díli, Tomás Pinto hateten katak, sistema avaliasaun iha eskola tékniku-vokasionál diferente ho sistema ezame ne’ebé aplika iha eskola sekundária jerál (ESJ).

“Eskola ESTV 28 de Novembro nia ezame modular la hanesan ho ezame baibain iha ESG sira. Tanba ne’e, ami-nia estudante sira tuir de’it ezame modular ne’ebé profesór ida-idak prepara, bazeia ba matéria no módulu ne’ebé sira aprende ona,” nia esplika.

Nia aumenta katak, prosesu avaliasaun ne’e importante atu prepara estudante sira, liuliu estudante klase 11, molok sira hahú estájiu iha tinan oin, ka iha inísiu tinan 2027.

Iha parte seluk, Diretór Eskola Hotelaria no Turizmu Becora, Charles Fatima Guterres mós konfirma katak, estudante sira iha eskola ne’e la tuir ezame hanesan estudante sira husi eskola sekundária jerál, maibé tuir de’it ezame modular.

“Ami-nia estudante sira la hala’o ezame hanesan estudante sira husi eskola sekundária jerál, tanba ami-nia estudante sira sei tuir de’it ezame modular,” nia dehan.

(jac)

Share it :

Leave a Reply

Your email address will not be published. Required fields are marked *