Falta Alkatraun & Sementi Atrazu Progresu Projetu Estrada iha Baucau

BAUCAU, STLTIMORLESTE.com – Falta stok alkatraun no aumentu folin sementi sai obstákulu ba progresu implementasaun projetu reabilitasaun estrada urbana no rural iha Munisípiu Baucau.

Koordenadór Tékniku Ministériu Obras Públikas (MOP) Destakadu Munisípiu Baucau, Diego Caleza, esplika katak projetu reabilitasaun estrada urbana husi área Nagardjo to’o Hospitál Rejionál Eduardo Ximenes (HoREX) atinji ona progresu físiku 42,45%.

Nia hateten katak, tuir planu, empreiteira atu kontinua ho aplikasaun alkatraun bee molok hala’o etapa tau asfaltu, maibé falta stock material ne’e iha merkadu parte kompaña seidauk implementa fui altakraun been.

“Projetu urbana JOVA leten ne’e. Progresu agora daudaun previzaun iha ona 42,45%, maibé ita hein aspal to’o mai atu kontinua nahe aspal iha sorin dalan ne’e,” hateten Diego ba jornalista sira iha Uatulete, Baucau, Kinta (19/11/2026).

Nia subliña katak, planu fui altakraun been kobre distánsia liu 2 kilometru, husi área Nagardjo to’o edifísiu BOP. Maibé seidauk, tanba falta stock alkatraun obriga empreiteira atu kontinua de’it ho servisu sira ne’ebé bele hala’o, inklui servisu preparasaun no tortoar.

Aliende mós nia dehan, projetu estrada urbana pakote daruak ne’ebé implementa husi kompaña Vegel husi rotunda Vila Nova Baucau to’o área Tirilolo atinji ona progresu fiziku 23% resin, iha ne’ebé parte kompaña atual kontinua servisu iha tereñu tanba kopera masimu husi komunidade afetadu sira.

“Vegel nian agora 23% ital komunidade afetadu sira maioria hetan hotu ona idemnizasaun tama hotu ona konta tanba ne’e komunidade sira iha inisiativa di’ak sobu rasik sira nia renzidensia,”

Kona-ba Projetu Estrada Rural

Além projetu urbana, Diego mós temi katak projetu estrada rural balun iha Baucau enfrenta problema hanesan, liuliu tanba falta alkatraun been ne’ebé impede empreiteira atu konklui servisu.

Nia fó ezemplu estrada iha Badumori, ne’ebé orsamentu tama ona, maibé servisu seidauk bele kontinua tanba falta alkatraun been. Iha Samalari, servisu estrada hela de’it ho parte ne’ebé seidauk konklui, ho distánsia 67 metru, tanba razaun hanesan inklui mos estrada Ailemilari to’o Samaguia ne’ebé responsabiliza husi kompaña Nautetu Unip.Lda.

Diego hatutan katak, problema la’ós de’it kona-ba aspal, maibé mós sementi, tanba folin iha merkadu sa’e liu kompara ho estimativa inisiál ne’ebé prepara ona iha kontratu.

“Folin sementi ne’ebé antes estimadu entre US$4,35 to’o US$4,50 kada saku, agora sa’e to’o US$5,50. Situasaun ne’e mós afeta kapasidade empreiteira atu kumpre servisu tuir estimativa orsamentu inisiál,” Diego informa

Tuir Diego, situasaun ne’e obriga parte téknika atu buka solusaun, inklui halo aprezentasaun no rezolusaun kona-ba diferensa folin material, ne’ebé Ministru Obras Públikas simu ona, maibé prosesu desizaun seidauk iha.

Nia espera katak, solusaun ba problema fornesimentu material no diferensa folin bele hetan lalais solusaun atu projetu estrada sira iha Munisípiu Baucau bele kontinua no konklui tuir planu.

Entre kompaña sira ne’ebé mensiona, STL tenta konfirma parte kompaña JOVA Constraction Unipessoal Lda, maibé laiha fatin atu fó komentáriu.

(tom)

Share it :

Leave a Reply

Your email address will not be published. Required fields are marked *