“Kazu Palomita: Omisídiu Agravadu”

Foto Iluminasaun

DÍLI, STLTIMORLESTE.com – Jurista Sergio Dias Quintas konsidera kazu mate Palomita bele kualifika nu’udar omisídiu agravadu, tuir Kódigu Penál.

Jurista Sergio Dias Quintas hato’o nia perspetiva jurídika kona-ba kazu mate Palomita, ne’ebé akontese, ho indikasaun sirkunstánsia omisídiu agravadu.

Tuir nia análize, hahalok ne’ebé akontese bele kualifika nu’udar krime omisídiu agravadu, tuir Artigu 139 Kódigu Penál, ho moldura pena tinan 12 to’o 25.

Nia esplika katak, sirkunstánsia agravante bele inklui tortura, hahalok kruél, aumenta sofrimentu vítima no premeditasaun.

Premeditasaun bele konsidera bainhira arguidu iha tempu atu reflete kona-ba meiu ne’ebé sei uza no hametin intensaun atu oho vítima durante oras 24.

“Krime ne’ebé akontese bele kategoria ba krime omisídiu agravadu, previstu iha Artigu 139, husi Kódigu Penál, ho nia moldura pena husi tinan 12 to’o tinan 25,” afirma Sergio Dias Quintas iha Kaikoli, Kinta 19/11/2026.

Relasiona ho ema sira ne’ebé haree akontesimentu, maibé la intervém ka bolu polísia, jurista ne’e konsidera katak responsabilidade kriminal depende ba obrigasaun jurídika atu evita rezultadu ne’e.

Nia refere ba Artigu 11, númeru 2, Kódigu Penál, ne’ebé regula responsabilidade kriminal tanba omisaun.

“Omisaun ne’ebé hamosu rezultadu ruma sei hetan de’it pena kuandu omitente rasik iha obrigasaun jurídika atu evita rezultadu ne’e,” nia hatutan.

Nia mós defende katak, responsabilidade kriminal la’ós de’it ba ajente ne’ebé komete krime, maibé bele inklui ema ne’ebé omite asaun, bainhira iha obrigasaun jurídika atu intervém.

Iha sorin seluk, akademiku Universidade Nasionál Timor Lorosa’e (UNTL), Rafael de Jesus, husu autoridade judisiária sira atu aplika kastigu todan ba autór ne’ebé hasai vítima nia vida.

“Tenke fó kastigu ne’ebé todan ba nia, atu nia hela iha prizaun hodi hetan kastigu ba nia aktu,” dehan Rafael de Jesus.

Nia aumenta katak, kastigu ne’ebé tribunál aplika tenke konsidera todan, tanba autór komete ona hahalok ne’ebé la loos no viola lei.

(ter)

Share it :

Leave a Reply

Your email address will not be published. Required fields are marked *