DILI, STLTIMORLESTE.com – Eskola Sekundária Tékniku-Vokasionál (ESTV) Kalu-Heda, iha Uatulari, Munisípiu Viqueque, enfrenta problema falta livru didátiku ba estudante sira, liuliu iha departamentu Jestaun Ekipamentu Informátika no Produsaun Agrária.
Adjuntu Diretór ESTV Kalu-Heda, Augusto Marques, hato’o katak, eskola ne’e iha difikuldade atu hala’o prosesu aprendizajen tanba livru didátiku ba estudante sira seidauk disponivel, maski livru manual ba profesór sira iha ona.
“Ami nia dezafiu ne’ebé eskola enfrenta mak falta livru didátiku hodi hanorin. Iha departamentu Jestaun Ekipamentu Informátika no Produsaun Agrária, ami iha de’it manual profesór, maibé estudante sira la iha livru,” dehan Augusto Marques, bainhira ko’alia ho STL liuhusi telefone, Kinta-feira (19/11/2026).
Nia esplika katak, problema falta livru ba estudante sira ne’e hahú kedas iha tinan 2022 to’o agora. Eskola nia parte hato’o ona preokupasaun no husu apoiu ba entidade relevante sira, hahú husi servisu edukasaun munisipál to’o nível nasionál, maibé seidauk hetan resposta.
“Problema ne’e hahú husi tinan 2022 to’o agora. Maski ami husu ona apoiu ba parte relevante sira, maibé to’o agora seidauk iha resposta, tanba asuntu ne’e tama iha kompeténsia Ministériu Edukasaun nian,” nia esplika.
Iha parte seluk, Koordenadór Gabinete Unidade Kurríkulu Nasionál iha Ministériu Edukasaun (ME), João Mau Pelu dehan katak, ministériu liuhusi Unidade Kurríkulu Nasionál, kontinua halo prosesu imprimisaun livru iha sentru imprensaun.
Nia informa katak, livru ba estudante klase setimu ano nian distribui hotu ona, ho kuantidade besik 27.000 ezemplár ba kada disiplina, atu asegura estudante sira hetan livru didátiku.
“Primeiru, livru sira ita halo imprimisaun, balun distribui tiha ona. Ba setimu ano, livru distribui hotu ona. Kuaze kada disiplina ita imprime 27.000 ezemplár, ho objetivu atu kobre estudante sira nia nesesidade,” João Mau Pelu informa.
Maski nune’e, nia rekoñese katak iha eskola balun seidauk simu livru tuir nesesidade estudante hotu-hotu. Tanba ne’e, nia husu ba kada eskola atu halo jestaun di’ak, inklui empresta livru ba estudante sira atu uza iha grupu durante prosesu aprendizajen.
Nia mós husu ba profesór sira atu utiliza livru ne’ebé disponivel iha eskola no fahe ba estudante sira, atu nune’e livru sira la hela de’it iha biblioteka, maibé bele uza efetivamente iha prosesu ensinu no aprendizajen.
Ba estudante klase ualu, João Mau Pelu informa katak Ministériu Edukasaun iha planu atu imprime 27.000 ezemplár ba kada disiplina, husi disiplina hamutuk 10, la inklui disiplina Relijiaun.
Nia enfatiza katak, bainhira livru seidauk sufisiente ba estudante hotu, eskola tenke organiza sistema utilizasaun livru iha grupu no asegura katak estudante sira entrega fali livru depois uza, atu estudante seluk bele hetan oportunidade atu utiliza.
Iha fatin seluk, Diretór Eskola Sekundária Jerál 10 de Dezembro Comoro, Manuel Verdial, dehan katak fasilidade meza, kadeira no kaderneta eskolar ba estudante sira iha eskola ne’e sufisiente. Maski nune’e, nia hatete katak difikuldade ne’ebé eskola enfrenta mak falta livru didátiku ba disiplina balun ne’ebé to’o agora seidauk sufisiente.
(jac)






