Distánsia Husi Laga ba Baucau Vila la Hamate L7 Nia Vontade Atu Servi

Prezidente Konselhu Munisipal Kombatentes Libertasaun Nasional (KMKLN) Baukau, Cornelio Gama "L7" (Foto: STL/Tomas Reis)

BAUCAU, STLTIMORLESTE.com – Maski idade aumenta, maibé nafatin enfrenta distánsia dook husi Laga ba Baucau Vila kada loron, Prezidente Konsellu Munisipál Kombatentes Libertasaun Nasionál (CMCLN) Baucau, Cornélio da Conceição Gama “L7”, kontinua kompromete atu hala’o servisu ba veteranu no kombatentes iha Baucau.

L7 hateten katak, durante fulan 11 nia servisu iha Baucau Vila, seidauk hetan uma hela, nune’e obriga nia kada halo viajen loroloron husi Postu Administrativu Laga ba Baucau Vila ho kareta privadu.

Nia esplika katak, kada dadeer antes tuku 08:00 sai husi Laga ba Baucau Vila atu hahú servisu. Bainhira oras almosu tuku 12:00, nia tenke fila ba Laga atu han meudia, no antes tuku 14:00 fila fali ba Baucau Vila atu kontinua servisu to’o remata. Depois, tuku 17:00 fila fali ba Laga.

“Ha’u tuir prinsípiu uluk iha ailaran, respeita Governu. Fulan 11 ona uma laiha. Dadeer ha’u tenke sai husi Laga mai servisu, meudia fila ba Laga, tuku 14:00 mai fali servisu no loraik fila fali ba Laga. Loron ida ha’u gasta gazoel to’o 40 litru,” L7 dehan ba STL iha Vila Antiga, Baucau, Kinta (19/11/2026).

Nia afirma katak, halo ona pedidu ba Ministériu Asuntu Kombatentes Libertasaun Nasionál atu hetan apoiu fatin hela, liuhusi utilizasaun uma patrimóniu Estadu balu iha Baucau Vila ne’ebé agora la utiliza, atu bele hela durante tinan lima no besik sede CMCLN Baucau. Maibé, to’o agora seidauk hetan solusaun.

Ba L7, distánsia Laga–Baucau Vila la’os de’it dezafiu tempu, maibé mós kustu transporte ne’ebé aumenta kada loron, liuliu kombustível ne’ebé sai nesesidade prinsipál atu hala’o knaar.

“Iha Laga mak mai servisu iha Baucau Vila, despeza boot tanba mina US$100 ba fulan ida nian la to’o loron haat hotu ona. Dala ruma ami tenke gasta ami-nia osan rasik atu sosa mina tau kareta,” nia haktuir.

Nia konsidera katak, apoiu US$100 resin ba kombustível kada fulan la sufisiente atu kobre nesesidade transporte, tanba nia tenke halo viajen fila-mai entre Laga no Baucau Vila kada loron.

Aleinde problema alojamentu no transporte pesoál, L7 mós hato’o preokupasaun kona-ba limitasaun kareta servisu ba atendimentu veteranu no kombatentes iha Munisípiu Baucau, ne’ebé kompostu husi postu administrativu ualu.

Nia hateten katak, kareta atual ida de’it ne’ebé disponivel iha CMCLN Baucau la sufisiente atu atende nesesidade servisu, liuliu vizita veteranu sira mate.

“Baucau ne’e iha postu ualu, bainhira veteranu mate ami tenke ba haree. Kareta ida de’it la aguenta. Dala ruma populasaun preokupa tanba veteranu mate, maibé komandante la ba tanba kareta ida de’it,” L7 haktuir.

Tanba ne’e, nia husu Governu atu aumenta apoiu transporte ba CMCLN Baucau, hodi fasilita servisu loroloron, liuliu iha atendimentu ba veteranu no família sira.

(tom)

Share it :

Leave a Reply

Your email address will not be published. Required fields are marked *