DILI, STLTIMORLESTE.com — Padre Paul Kerans konvida fiéis atu respeita isin nu’udar templu Espíritu Santu no prezente hosi Maromak.
Padre Paul Kerans, SVD ba STL, Sesta (20/11/2026) konvida fiéis kristaun sira atu kuida sira-nia isin no mantein relasaun ho Maromak, tuir Evanjellu Lucas 19:45-48, iha devosaun Sesta-feira, 20 Novembru 2026.
Iha refleksaun ne’e, nia esplika katak Jesus hirus ema sira ne’ebé uza templu iha Jeruzalén ba interese pesoál, no la respeita sagradidade uma Maromak nian.
Padre Paul Kerans afirma katak, Evanjellu ne’e fó hanoin ba fiéis atu respeita sagradidade ne’ebé Maromak entrega ba ema ida-idak.
Nia subliña katak, isin umanu mós nu’udar templu Espíritu Santu nian, ne’ebé ema tenke kuida ho responsabilidade no respeitu.
“Ita-nia isin la’ós ita-nian atu halo tuir ita-nia hakarak; sira maka prezente sira ne’ebé Maromak entrega mai ita,” afirma Padre Paul Kerans.
Nia aviza fiéis atu la husik influénsia mundu nian, foti-an no hakarak pesoál sai importante liu fali relasaun ho Maromak.
Tuir nia, buat hotu ne’ebé ema halo, inklui maneira atu kuida isin, tenke hatudu domin, agradesimentu no reverénsia ba Maromak.
Padre ne’e husu fiéis atu hanoin kle’an kona-ba sira-nia responsabilidade atu uza no proteje isin nu’udar prezente folin-boot hosi Maromak.
Nia konvida fiéis atu avalia sira-nia moris, atu la troka Maromak ho hakarak pesoál, maibé kontinua moris tuir valór espirituál no ensinamentu kristaun.
Refleksaun ne’e remata ho konvite ba fiéis atu fó onra ba Maromak liuhosi sira-nia hahalok, maneira moris no kuidadu ba isin rasik.
(eme)






