Ekipa ANFREL Diskute Demokrasia ho Horta

DILI, STLTIMORLESTE.com – Ekipa husi Asian Network for Free Elections (ANFREL) hasoru Prezidente Repúblika José Ramos-Horta atu diskute promosaun demokrasia no preparasaun ba eleisaun sira iha Timor-Leste.

Enkontru ne’e hala’o iha Palásiu Prezidensiál Nicolau Lobato, Bairru Pité, sexta-feira (20/11), ho objetivu ko’alia kona-ba dezafiu eleitorál no apoiu ba prosesu demokrátiku.

Iha biban ne’e Diretora Ezekutiva ANFREL, Brizza Rosales, hatete katak vizita ne’e parte husi esforsu organizasaun atu promove no dezenvolve demokrasia eleitorál iha rejiaun Ázia, liuhosi misaun observasaun eleisaun.

“Ami mai atu apoia rejiaun ASEAN, liuliu hodi promove no dezenvolve demokrasia eleitorál iha Ázia liuhosi misaun observasaun eleisaun,” Brizza Rosales dehan.

Nia esplika katak, ANFREL iha Timor-Leste atu hasoru parte interesada sira iha prosesu eleitorál no identifika lakuna no dezafiu sira antes eleisaun prezidensiál, lokál no parlamentár iha tinan rua oin mai.

Rosales mós informa katak, organizasaun ne’e hakarak hametin kapasidade observasaun eleisaun iha nivel nasionál, liuhosi diálogu ho instituisaun no parte interesada prinsipál sira.

Iha enkontru ne’e, ANFREL reprezenta mós husi Manjesh Rana, Ofisiál Sénior Programa, ne’ebé responsavel ba organizasaun no haruka misaun observasaun eleisaun internasionál hatete katak ANFREL observa ona eleisaun prezidensiál Timor-Leste iha 2023 no agora fila mai atu halo avaliasaun inisiál no advokasia.

ANFREL iha esperansa atu haruka fali misaun observasaun bainhira kalendáriu eleisaun publika ona no Komisaun Nasionál Eleisaun (CNE) konvida organizasaun ne’e.

Rosales afirma katak, ANFREL hakarak kontinua kontribui ba dezenvolvimentu demokrasia iha Timor-Leste, ne’ebé nia konsidera nu’udar esperiénsia ne’ebé bele sai referénsia ba nasaun seluk.

Iha biban ne’e Prezidente Repúblika José Ramos Horta hato’o bemvindo ba ekipa ne’ebé mai Palásiu hodi ko’alia kona-ba demokrasia iha Timor Leste.

(eme)

Share it :

Leave a Reply

Your email address will not be published. Required fields are marked *