Regiaun de Maria Hametin Espiritualidade

DÍLI, STLTIMORLESTE.com – Regiaun de Maria realiza kongresu daruak durante loron rua, ho objetivu hametin fiar, devosaun no misaun evangelizadora membru sira nian.

Kongresu ne’e hala’o ho tema jeral “Legionáriu mak Masin rai nian no Naroman Mundu Nian”, ho partisipasaun membru Regiaun de Maria husi Arquidiocese Dili, Diocese Maliana no Diocese Baucau,” dehan nian.

Xefi Komisaun Regiaun de Maria Timor-Leste, Elizabet Maria do Rosário Guterres de Oliveira, bá STL iha Salaun Sao Jose Katedral Dili, Sesta (20/11/2026).

Nia dehan, kongresu ne’e nu’udar atividade importante ne’ebé tenke realiza kada tinan rua, tuir orientasaun no manual Regiaun de Maria.

Nia esplika katak, objetivu husi tema ne’e mak atu hakle’an espiritualidade membru sira, nune’e sira bele komprende no hala’o knaar nu’udar masin rai nian no naroman mundu nian.

“La’ós atu hatudu de’it farda ka hateten katak ita nu’udar membru grupu kategorial ida, maibé liuhusi kongresu ne’e, ita bele hakle’an ita-nia fiar no devosaun ba Nai Feto”, nia dehan.

Nia kontinua hateten katak, kongresu ne’e mós sai oportunidade atu hametin relasaun entre membru sira, inklui estrutura komisaun, koría no presidium husi munisípiu no Diocese sira.

Tuir nia, tema ne’e importante tebes tanba nu’udar soldadu Maria, membru sira presiza sai ezemplu di’ak, hanesan masin ne’ebé fó sabor ba ema seluk no naroman ne’ebé ilumina ema sira iha mundu.

Tanba ne’e, liu husi kongresu ne’e, organizadór sira mós hakarak hetan kontribuisaun husi Madre sira atu orienta no esplika kle’an liután kona-ba oinsá membru Regiaun de Maria bele moris tuir espiritualidade no sai masin rai nian no naroman mundu nian.

Iha parte seluk, Presidium Nossa Senhora Imaculada, Diocese Maliana, Alfredo Soares, hatete katak kongresu daruak ne’e sai oportunidade di’ak atu hametin no dezenvolve Regiaun de Maria iha Timor-Leste.

Nia esplika katak, Regiaun de Maria hahú husi koría ida to’o lima, maibé agora dadaun aumenta ona to’o koría.

Nia hatutan katak, objetivu Regiaun de Maria mak dahuluk, hadomi no hadomi an rasik, no daruak, hadomi no ajuda ema seluk hanesan maluk sira.

Tanba ne’e, ita tenke hahú hosi ita-nia an rasik atu sai ezemplu. La’ós ko’alia de’it, maibé tenke hatudu liuhusi hahalok no tuir Nai Feto nia dalan.

Nai Feto la halo barullu, maibé barak liu halo orasaun, nia afirma.

Alfredo Soares mós subliña katak, nu’udar membru Regiaun de Maria, sira iha responsabilidade atu lori Evanjellu hakbesik ba sarani sira, liuhusi kapela, grupu iha bairru no komunidade, liuliu sira ne’ebé sei hela iha nakukun, atu bele hetan naroman no hakbesik liután ba Jesus.

Kongresu daruak Regiaun de Maria ne’e hala’o durante loron rua, hahú iha loron sexta to’o sábadu, ho partisipante sira mai husi membru Regiaun de Maria iha Dili, Arquidiocese Dili, Diocese Maliana no Diocese Baucau.

(joa)

Share it :

Leave a Reply

Your email address will not be published. Required fields are marked *