DILI, STLTIMORLESTE.com — Timor-Leste (TL) aproveita Prezidénsia CPLP atu hametin kooperasaun no promove oportunidade foun ba nasaun membru sira.
Timor-Leste kontinua hametin nia papél diplomátiku iha Komunidade Países de Língua Portuguesa (CPLP), liuhosi Prezidénsia Pro Tempore ba tinan 2026 no inisiativa atu dezenvolve kooperasaun entre nasaun membru sira.
Prezidente Repúblika, José Ramos-Horta hato’o pozisaun ne’e iha diskursu durante selebrasaun tinan 51 Independénsia Angola nian, iha Hotel Timor, Dili.
Ramos-Horta destaka katak, tinan 2026 marka aniversáriu ba dala 30 CPLP nian no koinside ho Timor-Leste nia Prezidénsia Pro Tempore iha organizasaun ne’e.
Iha Agostu, Timor-Leste simu Konsellu Ministru XXXI CPLP iha Dili, depois reuniaun ministeriál sira ne’ebé hala’o iha Jullu.
Nia konsidera Angola nu’udar parseiru importante iha prosesu definisaun prioridade CPLP nian no preparasaun Vizaun Estratéjika ba períodu 2027–2033.
“Ita hakarak CPLP ida ne’ebé dinámiku liu no orientadu ba rezultadu,” afirma Ramos-Horta, hodi defende mudansa hosi solidariedade istórika ba kooperasaun konkretu.
Prezidente ne’e hakarak CPLP dezenvolve kooperasaun ekonómika, sientífika, kulturál no teknolójika, hodi transforma lian Portugés ne’ebé fahe hamutuk ba oportunidade dezenvolvimentu.
Nia mós destaka importánsia diplomásia parlamentár, depois Prezidente Parlamentu Nasionál Timor-Leste, Maria Fernanda Lay, partisipa iha Asembleia Parlamentár CPLP ba dala XV, iha Luanda, Angola, durante Jullu.
Partisipasaun ne’e, tuir Ramos-Horta, hametin relasaun entre instituisaun parlamentár no reprezentante povu Timor-Leste no Angola.
Nia defende katak, kooperasaun CPLP tenke envolve instituisaun Estadu sira, sidadaun, estudante, profesór no emprezáriu atu kria ligasaun ne’ebé forte liután.
Timor-Leste nu’udar nasaun ne’ebé iha esperiénsia rezisténsia, restaurasaun independénsia no konstrusaun Estadu, bele kontribui ba hametin solidariedade no kooperasaun entre nasaun membru sira.
Prezidente ne’e mós subliña katak, CPLP tenke sai plataforma ne’ebé fó benefísiu konkretu ba povu sira, liuliu iha área edukasaun, formasaun profisionál, inovasaun no dezenvolvimentu ekonómiku.
Inisiativa sira ne’e hatudu Timor-Leste nia intensaun atu uza prezidénsia CPLP nu’udar oportunidade estratéjika hodi hametin diplomásia no aumenta nia kontribuisaun iha komunidade internasionál.
(eme)






