Selebra Susesu, Haluha Povu

Eis Deputadu Bankada Partidu Sosial Demokrata (PSD), Leandro Isaac. (Foto: Espesial)

DILI, STLTIMORLESTE.com — Leandro Isaac kritika kultura polítika ne’ebé gosta selebra susesu no vitória, maibé haluha realidade povu nian ne’ebé kontinua hasoru kiak, moras no falta servisu báziku.

Eis Koordenadór CNRT Konsulta Popular no eis Deputadu Partidu Sosial Demokrata (PSD), Leandro Isaac, hateten katak selebrasaun ba susesu ne’ebé seidauk fó mudansa ba povu sai hanesan vitória falsu, tanba problema fundamentál iha sosiedade kontinua hela.

Tuir nia, dala barak lideransa polítika fó importánsia ba serimónia, projetu no diskursu susesu, maibé la haree kle’an ba realidade moris povu nian.

“Dala barak ita halo festa iha vitória falsu nia le’eten, hodi haluha lia lós no verdade. Ita selebra hanesan ita manan ona, maibé povu sei kiak, moras no la hetan bee moos ka edukasaun di’ak,” dehan Leandro Isaac ba STL, iha Dili, Sesta (20/11/2026).

Nia esplika katak vitória loos la bele sukat husi diskursu, serimónia ka númeru iha dokumentu, maibé tenke haree diretamente husi mudansa iha povu nia moris loroloron.

“Se ita dehan dezenvolvimentu avansa ona, maibé agrikultór sei hein udan, estudante eskola iha edifísiu aat, no pasiente la hetan ai-moruk, entaun vitória ne’e falsu,” nia hatutan.

Leandro mos kritika kultura polítika ne’ebé gosta halo festa boot bainhira hetan projetu, orsamentu ka kargu, maibé la halo avaliasaun sériu kona-ba benefísiu no impaktu ba komunidade.

Tuir nia, interese grupu no hakarak mantein podér dala barak halo ema lakohi ko’alia lia lós, tanba tauk lakon kargu, projetu ka apoiu polítiku.

“Ita haluha lia lós tanba ita hanoin de’it oinsá atu mantein podér. Lia lós sai moruk, tanba ema prefere rona liafuan ne’ebé halo sira kontente, maski falsu,” dehan nia.

Nia alerta katak, nasaun ne’ebé ignora verdade sei difisil atu avansa. Timor-Leste nia istória harii liuhusi sakrifísiu, tanba ne’e jerasaun foun tenke mantein valor luta ba ukun-rasik-an.

Leandro husu lideransa polítika, sosiedade sivíl, Igreja, akademista no joven sira atu iha korajen ko’alia verdade, simu realidade no hatudu problema sira ne’ebé presiza hadi’a.

“Vitória loos mak bainhira povu moris di’ak. La’ós vitória iha festa, maibé vitória iha moris loroloron povu nian,” Leandro Isaac konklui.

Iha parte seluk, Observadór Polítika Manuel Soares apoia Leandro Isaac nia kritika, hodi hateten katak realidade polítika ohin loron hatudu distánsia entre susesu ne’ebé lideransa selebra no rezultadu ne’ebé povu simu.

Tuir Manuel, dala barak lider sira selebra orsamentu no projetu boot, maibé mudansa iha komunidade seidauk reflete susesu ne’ebé anúnsiu polítiku sira hatudu.

“Leandro Isaac ko’alia loos. Ita halo festa ba buat ne’ebé seidauk rezolve. Ita selebra orsamentu no projetu boot, maibé povu nia moris la muda,” dehan Manuel Soares.

Nia sublinha katak, nasaun presiza lider ne’ebé iha korajen atu simu kritika no ko’alia verdade, la’ós lider ne’ebé hakarak rona de’it liafuan ne’ebé fó kontente.

“Vitória loos la’ós iha dalan, maibé iha povu nia uma laran. Bainhira povu hahú moris di’ak, foin ita bele dehan ita manan duni,” Manuel hatutan.

Entretantu, Akademista Universidade da Paz (UNPAZ), Fernando Xavier, husi perspetiva akademika, konsidera katak vitória falsu mosu bainhira avaliasaun haree de’it rezultadu husi leten, la konsidera realidade iha komunidade.

Fernando hateten katak, universidade no akademista sira iha responsabilidade atu kontinua promove hanoin kritiku no ko’alia verdade, maski realidade ne’e dala ruma la fasil atu simu.

“Vitória falsu mak bainhira ita halo avaliasaun bazeia ba serimónia no diskursu, la’ós dadus no realidade povu nian. Ita tenke rona povu no haree dadus lolos,” dehan Fernando Xavier.

Nia mos konsidera edukasaun nu’udar dalan importante atu kombate kultura vitória falsu, liuliu hodi prepara joven sira atu analiza informasaun no la fiar lalais ba propaganda.

“Se joven sira la aprende buka verdade, aban-bainrua sei kontinua halo festa iha vitória falsu nia le’eten. Universidade tenke hanorin estudante atu hanoin kritiku no ko’alia lia lós,” Fernando hatutan.

(car)

Share it :

Leave a Reply

Your email address will not be published. Required fields are marked *