DILI, STLTIMORLESTE.com — Timor-Leste (TL) no Angola hametin kooperasaun turizmu liuhosi akordu bilaterál ne’ebé asina iha Jullu 2026.
Kestaun ne’e hato’o husi Prezidente Repúblika José Ramos Horta liu husi diskursu bainhira partisipa selebrasaun aniversariu Angola nia independensia ba dala 51 iha Hotel Timor Kinta kalan (19/11/2026).
Kooperasaun entre Prezidente hatete Timor-Leste no Angola iha setór turizmu tama iha etapa foun, depois nasaun rua asina akordu atu dezenvolve formasaun rekursu umanu, promosaun turístika no atrasaun investimentu.
“Akordu kooperasaun ne’e asina iha loron 31 Jullu 2026, iha Dili, ho objetivu atu diversifika relasaun ekonómika no kria oportunidade foun entre nasaun rua,” katak Horta.
Akordu ne’e asina hosi Vise-Primeiru-Ministru nu’udar Ministru Turizmu no Ambiente Timor-Leste nian, Francisco Kalbuadi Lay, no Sekretáriu Estadu Angola nian, Augusto Laurindo Kalikemala.
Ramos-Horta konsidera akordu ne’e nu’udar pasu konkretu ida atu transforma amizade istórika entre Timor-Leste no Angola ba kooperasaun ne’ebé fó benefísiu ekonomia ba nasaun rua.
“Turizmu bele hakbesik liután ita-nia povu sira,” afirma Ramos-Horta.
Nia hatutan hodi destaca importánsia setór ne’e ba promosaun interasaun kulturál no dezenvolvimentu ekonómiku.
Tuir nia, Angola iha diversidade paizajen, patrimóniu kulturál no rekursu naturál ne’ebé bele sai atrasaun ba vizitante internasionál.
Enkuantu Timor-Leste iha identidade kulturál úniku, rikeza ambientál no patrimóniu istóriku ne’ebé bele dezenvolve nu’udar produtu turístiku.
Prezidente ne’e afirma katak nasaun rua iha kapasidade atu aprende hosi malu no fahe esperiénsia iha dezenvolvimentu turizmu.
Área formasaun no kapasitasaun rekursu umanu sai mós prioridade importante iha akordu ne’e, atu hasa’e kapasidade profisionál no kualidade servisu turístiku.
Promosaun konjunta ba destinasaun turístika sira bele ajuda aumenta koñesimentu internasionál kona-ba potensialidade turístika Timor-Leste no Angola.
Aleinde ne’e, atrasaun investimentu sai parte importante hosi kooperasaun, liuliu atu kria oportunidade negósiu no dezenvolve infraestrutura turístika.
Ramos-Horta mós lembra katak relasaun bilaterál entre nasaun rua hetan dinamizmu foun liuhosi abertura Embaixada Angola nian iha Dili, iha Maiu 2025.
Prezensa diplomátika permanente iha Dili no Luanda bele fasilita diálogu, koordenasaun no implementasaun akordu kooperasaun iha futuru.
Ho akordu turizmu ne’e, Timor-Leste no Angola iha oportunidade atu hametin ligasaun ekonómika, dezenvolve rekursu umanu no promove patrimóniu kulturál no naturál nasaun rua nian.
(eme)






