DÍLI, STLTIMORLESTE.com – Estudante sira iha eskola hotu-hotu tenke aumenta sira-nia esforsu iha aprendizajen, atu bele hetan rezultadu di’ak iha ezame trimestrál III ne’ebé hala’o iha loron 23 fulan ida-ne’e.
Diretór Eskola Sekundária Jerál (ESG) 10 Dezembru Comoro, Manuel Verdial, hato’o informasaun ne’e ba STL, Sesta-feira (20/11/2026).
Manuel Verdial esplika katak, preparasaun ba ezame trimestrál III lao di’ak, no estudante sira ne’ebé sei tuir ezame hamutuk 1.100 resin.
Nia mós afirma katak, prepara ona fatin ba ezekusaun ezame.
“Ami-nia preparasaun ba ezame trimestrál III ne’e lao di’ak hela. Total estudante sira ne’ebé sei partisipa iha ezame ne’e hamutuk 1.100 resin. Fatin ba ezekusaun ezame mós prepara ona. Mensajen ba estudante sira mak tenke haksolok estuda, tanba atu hetan valor ne’ebé di’ak, depende ba estudante ida-idak nia esforsu,” nia komenta.
Nia kontinua esplika katak, profesor sira fó ona matéria ba estudante sira, nune’e estudante ida-idak tenke prepara an no estuda ho seriedade, tanba matéria hotu-hotu ne’ebé presiza ba ezame, profesor sira fó ona durante prosesu aprendizajen iha eskola.
Tanba ne’e, nia husu estudante sira atu uza tempu ho di’ak ba estudu, hodi bele hetan rezultadu ne’ebé di’ak iha ezame trimestrál III.
(jac)






