Husu Substitui Profesor Reforma

Ilustrasaun (Foto: Jurnal)

DÍLI, STLTIMORLESTE.com – Eskola Sekundária Jerál (ESJ) 10 de Dezembro Comoro husu apoiu hosi Ministériu Edukasaun atu haruka profesór foun hodi substitui profesór na’in rua ne’ebé tama ona ba reforma, tanba to’o agora eskola ne’e seidauk iha númeru profesór ne’ebé sufisiente atu garante prosesu aprendizajen.

Diretór ESJ 10 de Dezembro Comoro, Manuel Verdial haktuir ba STL, Sesta-feira (20/11/2026), katak eskola ne’e hasoru hela falta professór, liuliu iha área língua portuguesa, depois de professór na’in rua tama ona ba reforma tanba idade.

“Ita-nia profesór na’in rua reforma ona. Ita halo esforsu atu buka professór língua portuguesa na’in rua ne’e, tanba sira-nia idade tama ona ba reforma. Agora dadaun, iha tempu ne’e ita susar atu hetan professór, tanba Ministériu Edukasaun preokupa liu ho Banku Kádru (BK) atu prienxe nesesidade iha Ensinu Báziku ne’ebé mamuk, enkuantu ba Ensinu Sekundáriu seidauk,” nia dehan.

Manuel Verdial hatutan katak, eskola ne’e hatama ona lista nesesidade profesór ba entidade kompetente, ho objetivu atu iha tinan 2027, falta profesór na’in rua ne’ebé hanorin língua portuguesa bele hetan substituisaun.

Nia esplika katak, maski agora dadaun ESJ 10 de Dezembro Comoro iha total profesór na’in 63, númeru ne’e seidauk sufisiente atu responde ba nesesidade eskola nian.

Tanba ne’e, eskola kontinua hein apoiu hosi Ministériu Edukasaun atu asegura disponibilidade professór no hadi’a kualidade prosesu aprendizajen iha tinan letivu oin mai.

(jac)

Share it :

Leave a Reply

Your email address will not be published. Required fields are marked *