BAUCAU, STLTIMORLESTE.com – Aban, loron 10 Junhu 2026, vitima dezastre naturais (DN) hamutuk 185 iha Munisipiu Baucau, sei simu material rekuperasaun husi Autoridade Protesaun Sivil (APC – sigla português) no elimina 100 resin.
Komandante operasaun APC Munisipiu Baucau, Francisco Viana Freitas aprezenta, relasiona komunidade afetadu ba dezastre naturais neebe uma hela fatin hetan estragus total, kmaan no estragus natoon neebe APC Munisipiu Baucau relata ba nasional hamutuk 300 resin, maibe liu husi verifikasaun neebe halao husi ekipa nasional iha terrenu haree kondisoens uma estragus elimina 100 resin, tanba la priense kriteriu atu hetan material rekuperasaun.
“Dadus husi munisipiu ba nasional 300 ital, maibe depois iha re-verifikasaun hetan mak 185, nee pozitivu aban sira komesa hetan ona material rekuperasaun kategaria natoon, kmaan no grave,” hateten Komandante operasaun APC Munisipiu Baucau, Francisco Viana Freitas ba jornalista sira iha nia knaar fatin Tirilolo Baucau, Tersa (09/06/2026).
Nia sublina, material rekuperasaun neebe vitima dezastre naturais sira atu simu ba uma estragus total mak hanesan kalen tahan 50, sementi saka 50, besik beton, besi baja, pregu, martelu, arame kesi besi inklui balde no fundu mão de obra montante US$ 1.000.
Enkuantu uma neebe hetan estragus kmaan no natoon sei simu deit kalen no pregu, maibe difirensia iha osan mão de obra, hanesan estragus kmaan hetan osan montante US$ 600 resin no estragus natoon hetan osan montante US$ 750.
“Tuir ami nia lista hetan estragus total nee 10 resin. Uma sira nee insendiu no rai halai, kuandu rai halai ona ita labele hela nee estragus total ona,” Francisco katak.
Nia fo razaun, vitima dezastre naturais neebe antes nee ekipa APC Munisipiu Baucau hamutuk 300 resin relata ba nasional, maibe hetan eliminasaun 100 resin inklui mos vitima dezastre naturais Xefe Suku Ueru-Mata, Sabino Martins, husu atu halo reklamasaun iha tempu distribuisaun material rekuperasaun.
Entretantu, material rekuperasaun neebe tuir planu atu distribui iha loron 10 Junhu 2026 nee, transporta ona husi Dili ba Baucau iha loron 09 Junhu 2026.
(tom)
