DILI, STLTIMORLESTE.com — Banku Dezenvolvimentu Aziátiku (ADB) reafirma kompromisu atu kontinua apoia Timor-Leste (TL), liu-liu iha infraestrutura, servisu báziku no dezenvolvimentu setór privadu, atu suporta kresimentu ekonómiku no dezenvolvimentu sustentável iha futuru.
Diretór Nasionál ADB, Artur Andrysiak, hato’o kompromisu ne’e durante enkontru kortezia ho Primeiru-Ministru (PM), Kay Rala Xanana Gusmão, iha Palásiu Governu, Dili, Segunda-feira (28/09/2026).
“Hau iha onra boot atu hasoru ho Primeiru-Ministru Timor-Leste, Kay Rala Xanana Gusmão. Ami ko’alia kona-ba apoiu Banku Dezenvolvimentu Aziátiku ba Timor-Leste. ADB komprometidu atu kontinua apoia Timor-Leste, ho apoiu ne’ebé foka ba infraestrutura no servisu báziku sira,” dehan Artur Andrysiak.
Nia hateten katak, aleinde infraestrutura, ADB mós fó apoiu ba dezenvolvimentu setór privadu no hadi’a prestasaun servisu públiku iha área saúde no edukasaun, nu’udár parte hosi esforsu atu hametin dezenvolvimentu nasionál.
ADB hahú nia prezensa iha Timor-Leste iha 2002. Durante períodu ne’e, instituisaun finanseira internasionál ne’e fó ona empréstimu, subsídiu no asisténsia téknika ba programa no projetu prioridade Governu nian.
Apoiu ADB iha Timor-Leste la limita de’it ba infraestrutura. Kooperasaun ne’e mós envolve área sira ne’ebé importante ba dezenvolvimentu ekonomia no sosial, inklui servisu báziku, saúde, edukasaun no dezenvolvimentu setór privadu.
Através hosi apoiu finanseiru no asisténsia téknika, ADB kontribui ba esforsu Timor-Leste atu hadi’a kapasidade instituisaun, aumenta asesu komunidade ba servisu no kria kondisaun ne’ebé bele suporta kresimentu ekonómiku iha tempu naruk.
Enkontru entre ADB no Xefe Governu mós sai oportunidade atu diskute oportunidade kooperasaun no oinsá instituisaun ne’e bele aumenta tan nia apoiu iha área sira ne’ebé Governu konsidera importante ba dezenvolvimentu Timor-Leste.
Aleinde ne’e, ADB mós fó apoiu ba prosesu adezaun Timor-Leste ba ASEAN, inklui preparasaun sira atu Timor-Leste sai nasaun organizadór ba Simeira ASEAN iha 2029.
Kooperasaun entre Governu Timor-Leste no ADB ne’e kontinua sai parte hosi esforsu atu hametin infraestrutura, hadi’a servisu báziku, dezenvolve setór privadu no kria baze ba dezenvolvimentu nasionál sustentável iha futuru.
(jos)
