DILI, STLTIMORLESTE.com – Ministru Prezidensia Konselhu Ministrus (MPKM), Agio Pereira prezide serimonia fo pose ba Prezidente no Vogais Konselhu Diretivu no Fiskal Uniku Imprensa Nasional Timor Leste, Institutu Publiku (INTL, IP) nian.
Serimonia nee hahu ho leitura rezolusaun Governu no despaixu nomeasaun ba membru foun Diresaun INTL, IP nian, tuir fali ho kompromisu onra ba sira neebe simu no asina termu pose. Iha okaziaun nee, Prezidente INTL, IP reprezenta sira neebe simu pose, hatoo agradesimentu, hodi reforsa ekipa nia kompromisu atu serbi Estadu ho dedikasaun no profisionalizmu.
Renovasaun mandatu Prezidente Konselhu Diretivu nee bazeia ba Rezolusaun Governu nu. 4/2025, loron 24 fulan Janeiru, neebe destaka kompeténsia, imparsialidade no esperiensia Jaime Fernando dos Martires Carvalho nian hodi lidera instituisaun nee.
Rezolusaun nee sublina katak, Prezidente atuál Konselhu Diretivu Imprensa Nasionál nian plenamente artikula no alina ho objetivus tutela nian ba dezenvolvimentu servisu ida nee no hatudu ona kompetensia exelente, imparsialidade no apartidarizmu nuudar funsionariu publiku.
Ministru Prezidensia Konselhu Ministrus (MPKM), Agio Pereira katak, importansia Imprensa Nasional Timor Leste, Institutu Publiku (INTL, IP) mak atu halo divulgasaun aktus ofisiais no produsaun dokumentu ho importansia aas ba Estadu no sidadaun sira.
“Momentu ida nee marka kompromisu ita hotu neebe servisu iha nee, Governu ho modernizasaun no fortalesimentu husi entidade ida nee, neebe esensiál ba komunikasaun ofisiál no dezenvolvimentu ba ita ria rain,” hatete Ministru Agio Pereira wainhira Prezide serimonia pose ba Prezidente no Vogais Konselhu Diretivu no Fiskal Uniku Imprensa Nasional Timor Leste, Institutu Publiku (INTL, IP) iha Palasiu Governu, Sesta (21/02/2025).
Ministru sublina, nesesidade atu kontinua investe iha kapasitasaun rekursus umanus instituisaun nian.
“Kapasita sira ho kompetensia nesesaria atu hasoru dezafius husi setor ida nee nian neebe evolui beibeik, foka ba beibeik iha dijital,” dehan governante nee.
Governante nee mos espresa konfiansa tomak iha kapasidade no kompetensia Konselhu Diretivu no Fiskal Uniku nian, neebe ohin simu pose atu lidera, transformasaun ida nee, no hasae instituisaun ida nee ba nivel exelensia foun ida
Aleinde nee Ministru Prezidensia Konselhu Ministrus, Agio Pereira mos reafirma kompromisu atu servisu ho determinasaun ho membrus foun Diresaun INTL nian, hodi halo Imprensa Nasional Timor Leste sai referensia ida kualidade, inovasaun no servisu publiku.
Entretantu liu husi iha kompromisu onra Prezidente INTL, IP, Jaime Fernando dos Mártires Carvalho deklara kompromete sei servisu tuir konstituisaun haruka no leal ba Estadu.
“Hakruuk ba konstituisaun no leal ba Estadu no Governu hodi halao funsaun ofisial ho izensaun, dedikasaun no responsabilidade nomos tau nafatin iha konsiderasaun lo-loos interese Estadu, Programa Governu no valores funsaun publika nian,” dehan Jaime.
Entretantu Jaime Fernando dos Mártires Carvalho simu kargu nuudar Prezidente Konselhu Diretivu INTL, IP hetan renovasaun, Pedro Sarmento nomeadu ba kargu Vogal no Visi Prezidente, António Marcos Alves, nomeadu nuudar Vogal Konselhu Diretivu, no Nelson Maria dos Santos Menezes nomeadu nuudar Fiskal Uniku ba entidade nee.
Serimonia nee hetan partisipasaun husi Sekretariu Estadu Komunikasaun Sosial, Expedito Dias Ximenes, Komisariu husi Komisaun Funsaun Publika, Fausto Freitas da Silva, Inspetor-Jeral Estadu, Francisco de Carvalho, Diretór jeral Administrasaun Prezidensia Konselhu Ministru, Pedro Feno no Xefe Gabinete Ministru Prezidensia Konselhu Ministrus nian, Victor Maia, no mos dirijente no funsionariu sira Prezidensia Konselhu Ministru nian.
(alb)
