DÍLI, STLTIMORLESTE.com — Tribunal Judisiál Primeira Instánsia Dili (TJPID) liu husi prosesu primeiru interrogatóriu, deside aplika medida aprezentasaun periódika ba arguidu ho inisiál AG.
Arguidu ne’e submete mai iha tribunal, tanba Ministériu Públiku (MP) akompaña nia ho alegasaun kona-ba krime arma branca.
Iha prosesu primeiru interrogatóriu, depois rona arguidu nia deklarasaun, prokurador husu tribunal atu aplika medida aprezentasaun periódika ba arguidu.
Enkuantu husi parte defeza aseita ho pedidu Ministériu Públiku no husu tribunal atu aplika medida hanesan ba arguidu.
Depois rona alegasaun husi parte sira, juiz deside aplika medida aprezentasaun periódika ba arguidu, ho obrigasaun atu aprezenta an regularmente iha esquadra polísia ne’ebé besik liu ba nia fatin hela.
Prosesu primeiru interrogatóriu ne’e prezide husi Juiz Rozito Guterres. Ministériu Públiku reprezenta husi prokurador ida, enkuantu arguidu hetan asisténsia legal husi defensor públiku ida.
Tuir prosedimentu, iha prosesu primeiru interrogatóriu, tribunal deside medida koasaun ne’ebé aplika ba arguidu, enkuantu prosesu investigasaun sei lao hela.
Tuir kronolojia, akontesimentu iha Audian, iha momentu ne’ebá, ema balu tenta atu halo asaun hasoru arguidu sira. Tanba ne’e, ho intensaun atu defende an, arguidu utiliza arma branka ne’ebé iha.
(ter)
