DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun, deside kondena arguidu JCS ho pena prizaun tinan 2, suspende ba tinan 3.
Iha sala julgamentu laran, Juiz prosesu Jose Quintao deklara katak, faktus neebe konsta iha akuzasaun provadu hotu, katak arguidu komete duni krime Violensia Domestika ho forma Maustratus ba Konjuje hasoru lezada OS neebe hanesan arguidu nia parseiru moris.
Juiz deklara katak, provadu arguidu halo agresaun hasoru lezada iha tinan 2021, arguidu basa dala ida iha lezada nia hasan.
Provadu iha tinan 2021, loron no fulan la apuradu, arguidu lori ai sanak ida baku iha lezada nia ain.
Provadu tinan 2022 iha Hera, arguidu tuku lezada iha matan fukun, tuku kona iha inus, tuku iha kanuruk, tuku iha rentos, kauza moras no bubu.
Tribunal konsidera, provadu motivu husi problema neebe akontese iha Hera, tanba momentu neeba lezada prepara hahan ba arguidu han, maibe arguidu lakohi han hahan nee, fakar tiha hahan nee, halo kedan agresaun hasoru lezada.
Provadu katak, sira diak malu ona no oras nee daudaun kontinua moris hamutuk.
Juiz deklara, konsekuensia husi arguidu nia hahalok lezada hetan moras. Maibe perante Tribunal arguidu konfesa ba faktus, hatoo nia arependimentu, promete sei la halo tan hahalok nee iha futuru.
Tribunal tetu sirkunstansia atenuantes sira hotu, ikus mai Tribunal haree maske sira diak malu ona, maibe atu halo prevensaun ba iha futuru, Tribunal deside aplika pena prizaun tinan 2, suspende ba tinan 3.
Prosesu ba desizaun nee lee husi Juiz Jose Quintao, Ministeriu Publiku no defeza Tribunal notifika deit desizaun.
(ter)
