DILI, STLTIMORLESTE.com – Tribunal Judisial Primeira Instansia Dili liu husi desizaun ikus, kondena arguidu ho inisial MM hanesan laen ho pena multa, tanba konsidera provadu ba iha krimi neebe Ministeriu Publiku akuza hasoru arguidu tanba halo duni agresaun hasoru lezada EM hanesan feen.
Iha sala julgamentu laran Juiz prosesu Arjentino deklara katak, faktus neebe konsta iha akuzasaun provadu hotu, katak arguidu halo duni agresaun hasoru lezada. No momentu neeba halo tiha agresaun, lezada no arguidu diak malu fali too mai agora.
Juiz haree katak krimi violensia domestika kontinua aumenta, tanba nee atu halo redusaun iha futuru, Juiz deside hodi aplika pena multa US$ 90 ba arguidu. Juiz prosesu mos esplika katak, kuandu arguidu la kumpri pena multa neebe iha, arguidu sei kumpri pena alternativa durante loron 80 iha prizaun.
Tribunal mos esplika ba arguidu atu la konkorda ho desizaun nee bele liu husi nia defeza hodi halo rekursu.
Tuir akuzasaun neebe iha katak, ofendida EM moris hamutuk hanesan feen ho laen ho arguidu MM, iha tinan 2020 iha oan nain 3 (tolu), no ekonomikamente dependensia ba arguidu.
Iha loron 21 fulan Fevereiru tinan 2024, haleu oras tuku 07:00, OTL, iha Suku Liurai Aileu, arguidu MM derrepente kaer tiha ofendida nia kanotak dudu ba iha parede, liman sikun parte karuk kona tiha parede, depois arguidu lori liman kukun rakut ofendida nia hasan no tilun hun sorin los.
Konsekuensia direta husi agresaun nee, ofendida hetan moras iha liman sikun sorin karuk, kanek boot, raan sai barak, moras makaas iha hasan, konsientemente no tilun hun sorin los.
Arguidu MM halo ho forma livre, deliberada no hatene katak kaer iha ofendida nia kanotak dudu ba iha parede, liman sikun parte karuk kona iha parede, depois arguidu lori Iiman kukun rakut iha ofendida nia hasan no tilun hun sorin los nudar meu neebe aptu hodi hamosu ofensa ba lezada nia isin lolon no saude.
Arguidu hatene katak nia hahalok nee proibidu no punidu tuir lei penal.
Tanba nee konstitui arguidu MM nuudar autor material ho forma konsumadu ba pratika krimi ofensa ba integridade fizika simples ho forma violensia domestika 1 (ida) previstu no punidu tuir artigu 145 husi Kodigu Penal konjuga no artigu 35° hosi Lei Kontra Violensia Domestika numeru 07/2010, loron 07 fulan Julhu.
Audensia julgamentu nee prezide husi Juiz Singular Arjentino Nunes, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku, Ancelmo.
(ter)
