DILI, STLTIMORLESTE.com – Bee hemu neebe seguru no konfiavel mak fundamental ba saude publika, sobrevivensia labarik nian no dezenvolvimentu sustentavel.
Liafuan nee haktuir husi Xefe Seksaun Bee, Saneamentu no Ijiene, UNICEF Timor Leste, Yume Yorita liu husi nia diskursu iha okaziaun Establesimentu Grupu Servisu Bee iha Timor Leste no inkontru dahuluk iha salaun Kofi Annan, Campaun UN Kaicoli, Kinta (18/06/2026).
Liu husi diskursu nia hatete, UNICEF nia apresiasaun sinseru ba Governu Timor-Leste, partikularmente Ministeriu Saude (MS) no ministeriu relevante sira, ba sira-nia lideransa no kompromisu atu hadia kualidade bee iha nasaun tomak.
“Bee-hemu neebe seguru no konfiavel maka fundamental ba saude publika, sobrevivensia labarik nian, no dezenvolvimentu sustentavel. Enkuantu Timor-Leste halo ona progresu neebe diak tebes hodi habelar asesu ba servisu bee nian, asegura katak bee ida-nee seguru no ho kualidade diak, sai nafatin dezafiu ida neebe krítiku. No hanesan ita hotu hatene, daudauk nee seidauk iha dadus publikadu kona-ba estatutu kualidade bee nasaun nian,” dehan nia.
Tuir nia, bee neebe kontaminadu kontinua fo risku ba komunidade sira, kontribui ba moras neebe hadaet husi bee no afeta ba labarik sira-nia kresimentu no dezenvolvimentu.
Estabelesimentu Grupu Servisu ba Kualidade Bee ida nee hatudu kompromisu konjunta iha asaun koordenasaun, bazeia ba evidensia, no multisetorial. Hodi halibur parte interesada xave sira iha plataforma ida nia laran, bele hametin sistema monitorizasaun, harmoniza padraun no abordajen sira, no asegura katak dadus informa polítika no pratika ho efetivu.
UNICEF sente orgulhu atu apoia inisiativa ida-nee nuudar parte ida husi kompromisu boot-liu atu hametin sistema Bee saneamentu no ijene (BESI) no salvaguarda saude no moris-diak labarik ida-idak nian. Dezde 2019 apoia MS iha vijilansia ba kualidade bee liu husi fornese ekipamentu teste no reajente-sira iha munisípiu hotu-hotu, inklui Atauro.
Nia dehan, fiar katak Grupu Servisu ida nee bele halao papel krítiku ida iha, hasae vijilansia ba kualidade bee no jestaun dadus, promove aprosimasaun sira bazeia ba risku hanesan planeamentu seguransa bee nian. Hametin koordenasaun no responsabilizasaun institusional. Fo apoiu ba kapasitasaun iha nivel nasional no sub-nasional. Susesu husi grupu servisu ida-nee sei depende ba propriedade konjunta no envolvimentu ativu husi membru hotu-hotu iha nee.
“Hau hakarak agradese ba KOICA neebe fo ona apoiu ba enkontru ohin loron nian. Mai ita uza plataforma ida nee laos deit atu identifika dezafiu sira, maibe mos atu harii solusaun sira neebe sustentavel no eskalavel. Importante liu, mai ita mantein komunidade sira-nia nesesidade no liuliu labarik sira nuudar sentru husi ita-nia serbisu, dehan nia.
Nia hatutan, UNICEF hein diskusaun produtivu sira ohin nian, no ba progresu neebe grupu servisu ida nee sei lori iha fulan no tinan sira tuir mai.
(dom)
