DÍLI, STLTIMORLESTE.com — Ekipa boxista husi Munisípiu Ermera kontinua hala’o preparasaun liuhosi treinu fíziku no tekniku, hodi prepara atleta sira atu kompete iha eventu Revolta Boxing 2026 ne’ebé agora daudaun lao hela.
Treinador Boxing Munisípiu Ermera, Mateus Soares dos Anjos hateten katak, ekipa Ermera prepara boxista hamutuk na’in 10, ho kategoria 48 kilogram, 51 kilogram, 54 kilogram, 57 kilogram no 60 kilogram. Kada kategoria sei reprezenta husi boxista na’in rua.
Mateus hateten, informasaun ne’ebé hetan hosi sorteiu determina katak boxista sira husi Munisípiu Ermera sei hasoru boxista sira husi Munisípiu Aileu iha Revolta Boxing 2026.
“Ami iha atleta boxing na’in 10 ne’ebé sei kompete iha Revolta Boxing, ho kategoria 48 kilogram na’in rua, 51 kilogram na’in rua, 54 kilogram na’in rua, 57 kilogram na’in rua no 60 kilogram na’in rua. Wainhira ami dada rifa, ekipa boxing husi Munisípiu Ermera sei hasoru ekipa boxing husi Munisípiu Aileu,” hateten Mateus ba jornalista STL iha fatin treinamentu Boxing Munisípiu Ermera, Pantai Kelapa, Dili, Sesta (11/09/2026).
Nia hatutan katak, tanba kompetisaun besik ona, agora volume treinu ba boxista sira hatun ona no halo ho intensidade ne’ebé kontroladu. Medida ne’e atu mantein no prepara energia atleta sira antes tama ba ring.
“Ami la’ós foin agora mak prepara aan ba kompetisaun, maibé ami prepara aan ona antes. Agora atu tama ba kompetisaun Revolta Boxing, ami halo treinu kmaan kmaan deit no hatun volume treinu, atu nune’e ami bele prepara enerjia atleta sira hodi hasoru Revolta Boxing ne’ebé daudaun lao hela,” nia esplika.
Maski enfrenta limitasaun iha ekipamentu no fatin treinamentu, treinador Ermera nafatin enfatiza ensinamentu kona-ba téknika boxing ba atleta sira. Nia konsidera katak abilidade téknika importante tebes iha momentu kompetisaun.
“Iha boxing ema hotu bele tuku, maibé tuku ne’ebé ho téknika mak importante. Ami menus tebes ekipamentu no fatin, tanba fatin ne’ebé ami uza agora daudaun ne’e fo hosi Dili International School. Maibé ami nafatin hanorin téknika boxing ba boxista sira ne’ebé atu kompete iha Revolta Boxing, atu bele implementa iha riin leten,” dehan Mateus.
Enkuantu ne’e, atleta boxista Sezaltino Virgilio Noronha hateten katak, nia iha esperansa boot atu hetan vitória iha kompetisaun ne’e, ho objetivu atu lori naran diak ba Munisípiu Ermera.
Sezaltino hateten, preparasaun ne’ebé nia halo durante tempu treinamentu fo konfiansa ba nia atu enfrenta adversáriu. Nia mos apela ba atleta sira atu iha korajen no prontidaun bainhira tama ba kompetisaun.
“Hau iha esperansa katak hau sei manan iha kompetisaun ida ne’e hodi lori Munisípiu Ermera nia naran, tanba durante hau treinu halo preparasaun ne’ebé diak. Wainhira ita hakarak tama iha boxing, ita tenki iha korajen atu kompete no hasoru kualkér adversáriu iha eventu. Hau agradese mos ba komisaun tanba loke eventu Revolta ida ne’e, hodi ami atleta sira bele kompete,” hateten Sezaltino.
Ekipa Boxing Munisípiu Ermera hala’o treinu durante loron lima iha semana, nomeadamente Segunda, Tersa, Kinta, Sesta no Sábadu, hahú hosi tuku 17:00 to’o tuku 18:30.
Iha kompetisaun Revolta Boxing 2026, Munisípiu Ermera sei hasoru boxista sira husi Munisípiu Aileu iha Sábadu, 26 Setembru 2026.
(leo)
