BAUCAU, STLTIMORLESTE.com – Autoridade Munisipal Baucau liu husi reuniaun Konselhu Konsultivu Munisipal (CCM-sigla português) deside, sei realiza misa solenidade ba saudozu Francisco Guterres Lu-Olo.
Prezidente Autoridade Munisipiu Baucau, Veneranda Lemos aprezenta, liu husi reuniaun CCM iha Autoridade Munisipal Baucau neebe hetan partisipasaun husi Autoridade Postu, Suku inklui Diretor Servisu Munisipal no parseiru dezenvolvimentu sira iha salaun Apuramentu Vila Nova Baucau, deside sei realiza misa solenidade ba saudozu Francisco Guterres Lu-Olo.
“Ita sei aviza ba membru Konselhu hotu katak, misa ba saudozu eroi boot eis Prezidente Asembleia Konstituinte nia falesimentu aban sei organiza,” hateten Veneranda Lemos ba jornalista sira iha Salaun Apuramentu Vila Nova Baucau, Kuarta (24/06/2026).
Nia esplika, organiza misa solenidade ba saudozu Francisco Guterres Lu-Olo nuudar forma ida hodi hatudu respeitu no homenajen ba nia kontribuisaun ba nasaun. Tanba nee, Autoridade Munisipal Baucau sei koordena ho parte relevante sira atu garante misa solenidade refere bele realiza ho diak.
Nia sublina, realizasaun misa solenidade ba saudozu Francisco Guterres Lu-Olo nia falesimentu nuudar meiu ida atu fasilita komunidade iha Munisipiu Baucau hatoo omenajen ikus ba saudozu. Tanba razaun distansia no limitasaun transporte, povu barak iha Baucau sei la konsege ba Dili atu vizita saudozu nia kadaver no partisipa diretamente iha prosesu funeral ikus.
“Ita organiza misa solenidade ba saudozu nia falesimentu, tamba ema barak sei la bele too iha Dili atu fo nia ultimu omenajen ba saudozu ,tanba nee ita sei halo ida nee,” Veneranda komenta.
Misa solenidade nee sei sai momentu ida ba komunidade, autoridade no parseiru dezenvolvimentu sira atu hamutuk fo homenajen ba saudozu Francisco Guterres Lu-Olo, neebe durante nia moris kontribui ba luta libertasaun no dezenvolvimentu nasaun Timor Leste.
(tom)
