DILI, STLTIMORLESTE.com- Prezidente Movimentu Reafirmasaun Reformasaun Nasional (MORENA), César Valente fo hanoin ba jerasaun foun sira katak, nuudar jerasaun patriota, sira iha dever atu hadomi nasaun, respeita lider sira no valoriza luta husi inan-aman sira neebe uluk sakrifika aan no laran metin ba rai nee. Tanba jerasaun veteranu sira katuas ona, responsabilidade atu kontinua respeita lider sira nee monu ona ba kabaas jerasaun foun.
Iha komentariu neebe fo sai César Valente hatete katak, patriotizmu loloos laos deit koalia, maibe hatudu liu husi hahalok neebe responsavel ba futuru nasaun.
“Jerasaun patriota sira tenke hatudu domin ba nasaun, hadomi lider sira, no respeita nafatin luta husu inan-aman sira, tanba sira katuas ona. Agora mak tempu ba jerasaun foun atu assume responsabilidade hodi kaer metin valor sira neebe sira husik hela,” hatete César Valente ba STL, Kuarta nee (10/06/2026).
Prezidente MORENA nee mos fo avizu seriu katak, iha luta polítika, buat neebe importante liu mak honestidade no boa fee. Tanba iha mundu politika respeitu malu nuudar buat neebe krusial.
Nia dehan, moris politika tenke bazeia ba respeitu malu, maski iha diferensia hanoin.“Iha kualker politika, buat neebe importante liu respeitu malu. Iha MORENA, ita la tolera ema sira neebe la respeitu ema seluk. Se iha membru ida mak la respeitu ema seluk, ita sei expulsa kedas husi partidu, tanba ema sira neebe uza kbiit hodi hatun ema seluk mak inimigu real ba povu nian,” Valente hatete ho firme.
Relasiona ho disiplina interna, César Valente fo hanoin ba membru hotu katak, manual politika MORENA nian regula ho klaru konaba konduta membru sira nian. Tuir nia partidu nia estatutu no manual internal la permite membru ida, atu koalia aat ka hatun lider sira no sidadaun sira seluk.
“Iha manual politika MORENA nian, ita la admite membru ida koalia aat lider sira no sidadaun sira. Politika nee servisu ba povu, laos fatin atu fahe insultu ka koalia aat. Ita hakarak forma kuartu sira neebe, maturidade, edukadu, no iha integridade,” nia konklui.
Ho postura nee, MORENA hatudu katak sira preokupa tebes ho edukasaun politika no kualidade moras husi sira nia membru sira, hodi garante katak luta politika neebe sira halao bele lori benefisiu ba nasaun no povu Timor-Leste.
Iha parte ketak Observador Politika, Eduardo da Silva sublina katak, apelu ba respeitu entre jerasaun foun, no veteranu sira mak xave ba estabilidade nasional.
Tuir Eduardo, bainhira partidu ida disiplina nia membru sira atu la koalia aat membru sira, nee hatudu maturidade politika neebe bele fo kbiit ba konfiansa publiku, liu liu periode pre- eleisaun ka momentu politika neebe krusial.
Nia dehan, posizaun bele sai modelu ida ba partidu sira seluk atu valoriza nafatin dignidade lideransa nian, neebe nuudar pilar sentral husi edukasaun sivika no patriotizmu.
(car)
