DILI, STLTIMORLESTE.com – Centro Nacional Chega (CNC) I.P inaugura Edifisiu Sentru Arkivu Centro Chega foun neebe konstrui ho finansiamentu husi Orsamentu Jeral Estadu (OJE) neebe refleta governu ninia kompromisu ba prezerva memoria hametin infraestrutura arkivu publiku.
Serimonia inaugurasaun Edifisiu Sentru Arkivu Centro Chega foun iha Antigu Komarka Balide Dili, Tersa (9/6/2026) ofisialmente tesi fita husi Ministru Prezidensia Konselhu Ministru, Agio Pereira, reprezenta Primeiru Ministru (PM) Kay Rala Xanana Gusmão. Serimonia refere hetan partisipasaun husi Jeneral Reformado F-FDTL, Lere Anan Timur, Embaixador Korea ba TL, Chang Hayeon, reprezentante United National Educational Scientific and Cultural Organization (UNESCO), husi Jakarta Indonezia, Membru Parlamentu Nasional, Antonio Verdial de Sousa husi Bankada KHUNTO no konvidadu sira seluk tantu husi rai laran no rai liur.
Diretor Ezekutivu CNC, Hugo Maria Fernandes iha nia diskursu hateten, objetivu inaugurasaun Edifisiu Sentru Arkivu Centro Chega foun nuudar sentru ba prezervasaun arkivu no dezenvolvimentu sistema dokumentasaun modernu iha Timor-Leste (TL) nunee mos hamentin konsiensia publiku kona-ba importansia arkivu no prezervasaun memoria istoria.
Sentru Arkivu Centro Chega foun nee mos nuudar pasu importante ba hamentin nasaun ninia kapasidade iha jestaun arkivu, nuudar selebrasaun ida ba TL ninia kompromisu ba memoria konesimentu no progresu institusional. Nunee mos sentru ida nee sai hanesan konvite ida ba publiku, matenek-nain sira, governante sira neebe hola desizaun politika, no parseiru dezenvolvimentu sira atu refleta hamutuk kona-ba papel arkivu hodi forma sosiedade ida neebe informadu no prezerva fundasaun istoriku sira nasaun nian ba jerasaun sira tuir mai.
Iha biban nee, Diretor Ezekutivu CNC informa Edifisiu Sentru Arkivu Centro Chega foun nee kompleta ho fasilidade no sistema tekniku arkivu hirak neebe instala iha fatin foun nee. Fasilidade sira nee hetan apoiu husi United National Educational Scientific and Cultural Organization (UNESCO) ho Korea International Cooperation Agency (KOICA) liu husi kooperasaun internasional no inisiativa parseria institusional.
Iha oportunidade inaugurasaun nee CNC mos realiza espozisaun arkivistika ho seminar nasional. Espozisaun arkistika hanesan atividade edukasional neebe demonstra kolesaun arkivu istoriku selesionado neebe prezerva zere husi Centro Chega I.P.
Materia espozisaun hanesan dokumentus istoriku sira husi produtu konplitu ho rekonsiliasaun, arkivu audivizual kompostu fotografia istoriku ho dokumentu istoriku sira seluk.
Aleinde nee iha mos seminar nasional kona-ba politika no enkuadramentu juridikua kona-ba arkivu no ezbosu lei sibernetika, nuudar plataforma ida ba dialogu kona-ba jestaun arkivu.
(ger)
