DÍLI, STLTIMORLESTE.com — Klubu Voleibol Daçuate sai hanesan manan-na’in iha jogu hasoru Klubu Voleibol Hakmatek, ho rezultadu 3–1, iha kompetisaun Liga Voleibol Timor-Leste (TL) Segunda Divizaun, Époka Sexta 2026.
Jogu ne’e realiza iha Kampu Voleibol Ginásio Dili, Sábadu, 5 de Setembru 2026. Jogadora husi ekipa rua hatudu intensidade aas no kapasidade teknika ne’ebé di’ak, liuliu iha servisu, pasing, smash no bloku. Adeptu no apoiadór sira ne’ebé marka prezensa mos fó animasaun ba jogadora sira durante partida.
Iha set primeiru, Daçuate komesa jogu ho prestasaun di’ak no konsege kontrola ritmu jogu. Ho servisu no atake ne’ebé efetivu, Daçuate manan Hakmatek ho skor 25–21.
Depois deskansa, treinador husi ekipa rua kontinua fó motivasaun no orientasaun ba jogadora sira atu mantein konsentrasaun, joga ho disiplina no aproveita oportunidade sira iha quadra.
Tama ba set segundu, Hakmatek responde ho jogu ne’ebé forte liután. Ekipa ne’e konsege domina ritmu jogu no manan set segundu ho skor 25–20, hodi iguala rezultadu ba 1–1.
Iha set terseiru, Daçuate hamriik metin fila fali no hatudu domíniu no konsisténsia. Ho kombinasaun servisu no atake ne’ebé efetivu, Daçuate konsege manan set terseiru ho skor 25–18, hodi lidera 2–1.
Set ba dala haat sai determinante ba ekipa rua. Jogadora Daçuate hatudu esforsu tomak no konsentrasaun aas, aumenta presaun liuliu iha bloku no defeza. Esforsu ne’e fó rezultadu, tanba Daçuate konsege taka set ho vitoria 25–22.
Ho vitoria iha set ba dala haat, Daçuate ofisialmente sai manan-na’in, depois de manan Hakmatek ho rezultadu final 3–1.
Vitoria ne’e hatudu konsisténsia no kapasidade Daçuate atu kontrola jogu to’o remata. Enkuantu ba Hakmatek, derrota ne’e bele sai oportunidade atu halo avaliasaun ba sala no fraqueza sira ne’ebé mosu durante enkontru, hodi prepara an di’ak liután ba partida sira tuir mai.
Iha sorin seluk, apoiadór sira ne’ebé marka prezensa iha Ginásio, Dili, kontinua fó animasaun ba ekipa rua. Ambiente iha pavilhaun sai moris liután tanba apoiu no entusiasmu husi torçedor sira durante partida.
(leo)
