DILI, STLTIMORLESTE.com – Deputadu husi Bankada FRETILIN, Antoninho Sarmento hatoo ninia sentimentu triste neebe boot tebes simu notisias konaba pasamentu husi Prezidente Partidu FRETILIN, Francisco Guterres Lu Olo, neebe husik hela povu Timor Leste ho laran susar ida neebe boot.
Iha ninia deklarasaun, Antoninho Sarmento afirma katak, figura istoriku nee ninia pasamentu husik hela vaziu boot ida ba estrutura partidu no povu Timor Leste.
“Ita hotu triste tebes. Despedida derepente husi figura ida neebe dedika ninia vida durante tinan 24 nuudar guerrilheiru hodi luta ba indenpendensia, hanesan momentu ida neebe lori triste boot ba ita hotu,” dehan Deputadu Antoninho ba STL ho laran triste.
Tuir nia, Eis Prezidente Republika atual Prezidente Partidu FRETILIN, Francisco Guterres Lu Olo laos deit lideransa partidu, maibe nuudar simblu rezistensia neebe husik hela legadu sakrifisiu ho domin ba patria no povu maubere.
“Figura neebe ita respeita, neebe iha pasadu sai ezemplu iha ai laran durante tinan 24, agora husik ita derepente deit. Nee hanoin ida neebe triste tebes atu simu,” nia hatoo.
Iha lia fuan ikus, Deputadu Antoninho hatoo kondelensia ba familia enlutada no ba membru, militante no simpatizante FRETILIN hotu hotu. Nia fiar katak prinsipiu neebe grande eroi Dr. Lu Olo husik hela, bele kontinua sai inspirasaun ba jerasaun foun, veteranu no kombatente sira iha dalan ba dezenvolvimentu nasional ka konsolidasaun Estadu.
Iha parte ketak Akademista UNTL, José da Silva mos hatoo ninia sentimentu nuudar sidadaun no Akademista. Nia sublina katak, pasamentu ka fila hikas ba aman Maromak kadunan husi figura istoriku nee hanesan lakon boot ida ba nasaun, liuliu ba memoria koletiva konaba luta ba libertasaun nasional.
(car)
