DÍLI, STLTIMORLESTE.com — Deskonfia autoridade seguransa balu iha Komandu Munisípiu Liquiçá halo detensaun ilegal ba arguidu nain tolu (3), ne’ebé alega envolve iha kazu violasaun seksual kontra menor.
Arguidu nain tolu ne’e lori mai iha tribunal hodi hala’o prosesu primeiru interrogatóriu, tanba alega envolve iha kazu abuzu seksual kontra menor ne’ebé akontese iha Munisípiu Liquiçá, Kuinta-feira foin lalais ne’e.
Iha audiénsia julgamentu, tribunal analiza auto notísia krime ne’ebé polísia produz no hatama ba Ministériu Públiku.
Tuir dokumentu kazu ne’e, akontesimentu ne’ebé alega envolve arguidu sira akontese iha tuku walu kalan, loron 24. Enkuantu polísia halo kapturasaun ba arguidu nain tolu iha tuku walu dader, loron 25.
Tribunal konsidera katak, tanba akontesimentu no kapturasaun akontese liu ona oras walu, polísia tenke hetan mandadu judisiál molok halo detensaun ba arguidu sira.
Ho konsiderasaun ne’e, tribunal deside liberta arguidu nain tolu, tanba konsidera detensaun ne’ebé polísia halo la tuir prosedimentu legal.
“Tribunal liberta tiha [arguidu sira] tanba habeas corpus ka detensaun la tuir regra ne’ebé iha,” dehan fonte judisiál ida ba STL, iha Tribunal Dili, Segunda-feira (28/09/2026).
Prosesu primeiru interrogatóriu ne’e prezide husi Juíza Jumiati Freitas. Ministériu Públiku reprezenta husi Prokuradora Flaviana Cristóvão, enkuantu arguidu nain tolu hetan asisténsia legal husi Defensora Públiku Geanine Daos.
(ter)
