DILI, STLTIMORLESTE.com – Tribunal Judisial Primeira Instansia Dili (TJPID) halao prosesu primeiru interogatoriu ba arguidu nain rua (2) ho inisial JACR no MZX, neebe deskonfia naok karteira hodi rezulta Nadine Ribeiro Do Carmo lakon vida no Euodia Agile Do Carmo hetan kanek.
Arguidu nain rua lori mai Tribunal iha oras tuku 9:00, akompanha husi Autoridade Seguransa Polisia Nasional Timor Leste (PNTL).
Prosesu mai iha Tribunal ho numeru Nuc, 0602/26.PNSIK, no Ministeriu Publiku (MP) promove arguidu nain rua ho krime tolu.
Tuir regra neebe iha, iha prosesu primeiru ingerogatoriu nee, Juiz turnu sei halo identifikasaun ba arguidu nain rua. Banhira identifikasaun remata ona mak foin tama ba iha faze alegasaun husi Ministeriu Publiku (MP) no mos defeza arguidu nian. Enkuantu alegasaun remata ona mak foin tama ba iha despaisu ikus husi Tribunal.
No husi despaisu Tribunal nian mak foin haree, medida saida mak Tribunal aplika ba arguidu nain rua.
Tuir observasaun STL nian iha Tribunal, arguidu nain rua lori mai iha Tribunal utiliza ropa detidu. No oras nee daudaun arguidu nain rua foin submete ba iha prosesu identifikasaun ba uluk husi Juiz turnu.
Prosesu primeiru interogatoriu nee prezide husi Juiz Turnu Ivan Patrocenio, Ministeriu Publiku reprezenta husi Prokurador Aderito Tilman, arguidu nain rua hetan asistensia legal husi Defensor Publiku, Fernando de Carvalho.
Rekorda katak, suspeitu nain rua Polisia detein tanba deskonfia naok karteira iha Praia Dos Coquiros iha loron 07 fulan Junhu, hodi rezulta Nandine lakon vida.
Husi akontesimentu nee, ikus mai autoridade seguransa detein suspeitu nain rua iha BTN Tasi Tolu.
No informasaun neebe relata husi PNTL katak, motor neebe suspeitu nain rua utiliza nee laos suspeitu nain rua nian. Tanba nee se mak motor lakon bele hatoo informasaun hodi identifika motor nee.
(ter)
