DILI, STLTIMORLESTE.com – Dezempregu nee problema Governu nian, oinsa mak atu kria industria ou servisu barak, atu nunee fo servisu ba joven neebe remata estudu, se lae mak ema barak sai ba rai liur.
Dehan Mateus Maia de Jesus, hanesan Reitor EAST Timor Coffee Institute (ETCI) ba STL iha nia knaar fatin, Segunda nee (24/02/2025).
“Nee problema, kestaun ita halo graduasaun nee laos indikador ida mak atu servisu, maibe graduasaun nee ema ba eskola nee tanba aumenta ema nia siensia abilidade, oinsa mak bele muda ninia moris, agora dezempregu nee problema Governu nian, tanba Governu mak buka oinsa atu kria industria ou kampu servisu barak, atu nunee absolvesaun nee bele iha, agora se laiha mak akontese agora daudaun ita hasai ita nian ema ba liur barak, problema mak ida nee,” dehan Mateus.
Mateus dehan, Governu mak tenke iha planu ida hodi loke kampu servisu ba joven sira neebe remata sira nian estudu iha ensinu superior, tanba realidade neebe mak iha, menus kampu servisu joven sira sai ba servisu iha rai liur.
Iha fatin seluk, Diretor Ezekutivu TLCE, Jose Monteiro dehan, loos duni too agora graduadus barak mak seidauk hetan servisu no balu ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus, halo graduadus barak sai ba servisu iha rai liur.
Nunee mos Reitor ISC, Sebastião Pereira dehan, universidade prepara deit ema, agora liga ba menus kampu trabalhu nee Governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona, nee sira hahu halao graduasaun.
(jac)
