DILI, STLTIMORLESTE.com – Direjente eskola sira husi munisípiu Manufahi, Ainaro no Covalima, sei partisipa iha formasaun durante semana ida kona-ba implementasaun Programa Merenda Eskolar.
Asuntu ne’e hato’o husi Xefi Departamentu Programa Merenda Eskolar iha Ministériu Edukasaun (ME), Belchior Maria Almeida Barros, ba STL iha nia knar fatin, Sesta (25/09/2026).
Belchior hateten katak, formasaun ba direjente eskola sira iha munisípiu sira seluk hala’o ona no agora tama ona ba etapa ikus.
“Konaba formasaun ba ita-nia direjente sira, iha postu barak hotu ona ohin. Tanba ne’e, ohin iha Maliana remata ona. Segunda-feira, direjente husi Munisípiu Ainaro no Manufahi sei konsentra hotu iha Suai. Tanba ne’e, munisípiu tolu ne’e mak sei simu formasaun ba direjente sira iha etapa ikus ida ne’e,” dehan Belchior.
Nia hateten, segunda-feira, direjente eskola sira husi Munisípiu Manufahi no Ainaro sei konsentra iha Munisípiu Covalima atu tuir formasaun durante semana ida.
Formador sira ne’ebé sei fó formasaun ba direjente eskola sira mai husi Ministériu Edukasaun (ME) no Ministériu Saúde (MS).
“Formasaun ne’e kona-ba implementasaun Merenda Eskolar no oinsá atu uza orsamentu Programa Merenda Eskolar,” hateten nia.
(jac)
