DILI, STLTIMORLESTE.com – Kualidade infraestrutura publiku nian iha kapital Dili sai fali kestaun preokupasaun, liu-liu ho kondisaun drainajen foun balu neebe foin konstrui ka halo la too tinan ida maibe komesa naksobu no labele funsiona ho diak.
Bazeia ba observasaun direita iha terrenu, faktu neebe mosu iha imajen hatudu ho klaru katak tapa drainajen nian naksobu no monu tiha ba laran. Kondisaun nee kria kedas koak boot ida iha dalan ninin neebe nakloke no sai ameasa ba seguransa, hodi labele ona simu pezu ruma husi udan been ka sirkulasaun husi leten.
Iha laran drainajen neebe naksobu nee, faktu hatudu katak lisu oi-oin nakonu ona hodi taka netik sirkulasaun bee nian. Embalanjen plastiku husi bee moos, foer kopu nian, plastiku hahan nian, plastiku lisu nian no foer uma kain nian seluk mos namkari no metin tiha iha kuak neebe nakloke refere.
Aleinde lisu plastiku iha ninin mos nakonu ho rahun azuleju neebe naksobu no namkari deit iha rai leten. Rahun husi azuleju no fatuk kiik sira nee kahur malu ho rai kuak, hodi hatudu katak fatin refere laos deit naksobu iha laran, maibe mos ninia baze ninin komesa monu no kotu neebe bele estraga tan baze estrada nian.
Pozisaun lisu no drainajen neebe naksobu nee mos besik loos ho lisu fatin boot ida husi kor matak neebe besik iha ninin. Kondisaun nee hatudu katak, maski fatin lisu mos besik maibe tanba tapa drainajen nian nakloke tiha ona, foer sira nee fasil loos atu monu ba laran bainhira anin mai ka bainhira udan been fakar husi leten.
Bazeia ba kondisaun konstrusaun nee, beton tapa neebe uza ba drainajen nee hatudu ninia rezistensia neebe fraku tebes nuudar obra foun. Estrutura husi beton nee laos deit nakfera, maibe mos tesi no tohar ho forma neebe hatudu katak, todan ka baze material neebe uza karik la tuir padraun kualidade nian hodi simu todan husi veikulu ka sirkulasaun sidade nian.
Kondisaun drainajen neebe naksobu hodi nakloke hanesan nee fo risku boot mos ba seguransa publiku, liuliu ba labarik sira no mos transporte hanesan motorizada neebe liu husi estrada ninin nee. Se la hetan asaun lalais, kuak drainajen neebe nskonu ho foer no hosi azuleju nee sei lori fali dezastera inundasaun kiik iha tempu udan, tamba sirkulasaun bee nian metin total ona iha laran.
Kondisaun aat nee hamosu kedan reasaun no preokupasaun boot hosi komunidade lokal neebe halao hela negosiu iha neeba, tanba sira mak sai vítima direitu hosi dezenvolvimentu neebe la tuir kualidade. Komunidade kestiona tebes kualidade hosi supervizaun Governu nian ba obra sira neebe gasta osan Estadu nian ho porsentu boot, maibe ninia rezultadu la diak.
“Triste tebes tanba drainajen foin halo la too tinan ida maibe naksobu hotu ona. Bainhira tempu udan, bee labele suli no fakar sai fali ba estrada tanba laran nakonu ho lixo neebe metin no tapa drainajen neebe monu tiha ba rai,” haktuir Jaime da Silva hanesan sidadaun neebe halao negosiu iha fatin refere ba STL,Dili, Kinta nee (02/07/2026).
Nia hatutan,bainhira udan boot fakar hosi leten, bee hodi drainajen neebe metin nee lori mos foer ,no azuleju rahun sira sai ba estrada hodi kria tahu metan neebe halo dalan sidade nian sai foer.
Entretantu antes nee Ministru Obras Publika (MOP), Samuel Marcal hatete, kompahia sira neebe halao projetu laiha kualidade Governu sei lá selu, nunee beke hanorin kompahia sira halao servisu ho kualidade.
(car)
