DILI, STLTIMORLESTE.com – Polísia Nasionál Timor Leste (PNTL) liu husi Diresaun Servisu Investigasaun Kriminál (DSIK) asegura ona autor nain 2 iha sela polísia, tanba iha indisius envolve iha kazu Trafiku Umanu.
Nia dehan, PNTL kumpri ordem ezekuta mandatu Judisial Primeira Instansia Dili, iha informasaun tolu ida mak halo buska detensaun hasoru sidadaun nain tolu, neebe iha inisiu envolve iha kazu trafiku umanu.
“Hau hakarak infroma ba públiku ohin ita ezekuta mandatu buska aprensaun no detensaun hasoru sidadaun nain tolu, maibe ida ita la konsege halo detensaun, tanba sei iha prosesu administrasaun balun, maibe nain rua ho inisial NSH no IFPS daudaun nee ita asegura detein ona iha sela polísia,” hatete Porta Vos Komando PNTL, atual Diretor Diresaun Servisu Investigasaun Kriminál (DSIK), Superintendente Polísia João Belo dos Reis ba jornalista sira iha Komando Jeral PNTL, Dili, Kuarta (04/06/2025).
Diretor DSIK nee informa, daudaun nee sidadaun nain 2 iha autoridade seguransa PNTL nia fatin hodi submete ba prosesu investigasaun, kontinua detein iha sela polísia durante oras 72 tuir ordem mandadu buska aprensaun no detensaun husi Tribunál Judisial Primeira Instansia Dili nian.
“Sidadaun nain 2 nee envolve iha kazu trafiku umanu halo rekrutamentu ilegal atu lori sidadaun Timoroan nain 14 sai husi Timor Leste atu nasaun Eslobaquia liu husi sira nia kompanhia ida ho naran M neebe la rejistu hanesan ajensia rekrutamentu trabalhador nian, entaun ita simu ordem halo intervensaun hakarak proteje ita nia sidadaun Timoroan atu labele sai vitima ba kazu Trafiku Umanu iha nasaun seluk,” nia esplika.
Nia informa, dokumentu neebe Autoridade Seguransa PNTL halo buska no aprensaun daudaun nee sei halo verifikasaun no identifika hotu, depois sei relata fali informasaun sira tuir mai ba públiku hodi akompanha servisu Diresaun Servisu Investigasaun Kriminál (DSIK) nian.
“Atividade neebe Kompanhia bele halo tuir informasaun neebe ita simu husi vitima sira iha fulan kotuk tama mai, ita seidauk hatene informasaun atividade lao kleur ona, maibe ita sei halo investigasaun nain ba Kompanhia no vitima sira, tanba sira halo ona rekrutamentu ba Timoroan nain 14 atu lori sai husi Timor Leste ba nasaun Eslobaquia,” nia deklara.
Entretantu Autoridade Seguransa Polísia Nasionál Timor Leste (PNTL) lidera husi Diretor Diresaun Servisu Investigasaun Kriminál (DSIK), Superintendente Polísia João Belo dos Reis akompanha husi Xefe Operasaun DSIK ho membru Polísia sira hamutuk ho Servisu Informasaun Polísia kumpri ordem ezekuta mandatu buska aprensaun no detensaun hasoru sidadaun nain rua iha fatin la hanesan ho susesu iha area Juridiku Munisípiu Dili.
(jen)
