DILI, STLTIMORLESTE.com – Ekipa Jestor Programa (EJP) husi Ensinu Baziku Filial (EBF) Naroman tein Merenda Eskolar la ses husi orariu neebe mak iha ona.
Dehan Xefe Ekipa Jestor Programa (EJP) iha EBF Naroman, Adelina Soares ba STL iha nia knaar fatin, Segunda nee (24/02/2025).
“Ami tein menu tuir orariu neebe mak iha, tein loron Segunda nian ami tein tuir ida nee, nunee mos loron Tersa mai too Sesta, ami tein tuir duni menu iha orariu neebe mak iha ona, ami labele tein tuir fali ami nian hakarak, maibe ami haree ba orariu neebe mak taka ona iha nee, durante nee ami tuir formasaun, oinsa mak atu tein Merenda Eskolar nee ba ita nian estudante sira,” nia dehan.
Xefe EJP nee akresenta, durante nee sira tuir formasaun semana ida ou rua, tanba depende ba tempu neebe iha, tein Merenda Eskolar nee foin semana ida, iha semana kotuk sira tein loron haat deit, sira nain lima mak tein Merenda Eskolar.
Iha fatin hanesan, konselhu inan aman responsavel (KIAR), Anastacio de Araujo dehan, orariu ba menu Merenda Eskolar nee komesa iha loron Segunda too Sesta nee iha ona, hein deit Xefe EJP sira implementa tuir orariu ba menu neebe iha tiha ona, sira labele ses husi ida nee.
“Ami sempre mai halo kontrolu ba programa Merenda Eskolar, se la tuir menu, ami husu fali sira tanba saida, tanba iha orariu nee iha tiha ona,” nia esplika.
(jac)
