DILI, STLTIMORLESTE.com – Governu liu husi Sekretaria Estadu ba Igualdade ho Ministeriu Obras Publika iha planu monta lampu iha sidade nomos munisipiu sira, nunee bele redus kriminozu neebe hadau telefone hodi rezultadu sidadaun sira lakon vida.
Kestaun nee hatoo husi Sekretaria Estadu ba Igualdade, Elvina Sousa Carvalho ba jornalista sira iha Otel Palm Fatuhada, Tersa nee (09/06/2026).
Nia hatete, feto no labarik feto mak sai vitima ba kriminozu sira neebe ho bandalizmu hadau telefone no karteira ikus sai vitima balun too lakon vida, ho ida nee atu elimina, SEI ho Ministeriu Obras Publika sei monta lampu iha kapital Dili, liu liu fatin neebe nakukun.
“Numeru krime sei boot iha Timor Leste, dala barak vitima nee feto no labarik feto sira, hotu hotu tenke konkorda katak laiha toleransia ba aktu krime sira, krime saida deit mosu iha ita nia rai tanba Timor oan hotu iha direitu atu moris livre, moris ho dignu, moris ho livre lao sein presaun, lao sein tauk, tauk lakon sira nia vida ka hasoru krime ruma,” dehan Sekretaria Estadu.
Sekretaria Estadu hatete, labele tolera ema neebe sai kriminozu hodi hadau ema nia pasta no telefone sira ikus tenke halo ema sai vitima no lakon vida.
“Parte Sekretariu Estadu nia, ami hanoin importante iluminasaun, tanba tempu badak SEI ho parseiru, liu-liu Ministeriu Obras Publika haree hela iluminasaun iha Dili laran, katak fatin publiku sira iha Dili laran ka iha munisipiu sira tenke iha iluminasaun neebe mak diak, katak iha lampu lao neebe naroman nunee ita lao tauk nunee minimiza ema halo krme,” katak nia.
Nia hatete, liga ho kazu neebe sidadaun sira hadau karteira joven nain rua monu ida halakon vida, sidadaun balun mos konta katak dala barak kriminozu sira subar iha fatin neebe nakukun laran, nunee bainhira hetan ema ho motor liu sira sempre duni tuir hodi hadau telefone no karteira, ho ida nee mak Governu liu husi SEI no MOP iha planu sei monta lampu iha fatin neebe nakukun.
“Horiseik kolega ida hatete hau dehan sira barak mak subar iha fatin nakukun, sira para hadau ema nia telefone ka ema nia karteira, tanba nee hau hanoin ita sei bele koalia para bele nafatin iha politika ida hodi halo kapital dili sai fatin naroman diak, husu ita hotu iha responsablidade atu bele asegura seguransa,” katak nia.
Nia hatete, Timor oan hotu tantu feto no mane iha direitu moris livre husi presaun husi krime, tanba Timor ukun aan ona, tanba saida moris nafatin iha presaun nia laran.
(eme)
