DILI, STLTIMORLESTE.com – Prezidente Repúblika (PR), José Ramos-Horta simu karta kredensial husi embaixadores na’in 13 husi nasaun oioin.
Prezidente Repúblika, José Ramos-Horta, simu karta kredensial husi embaixadores na’in 13 husi Áustria, Béljika, Fiji, Guatemala, Israel, Lituánia, Mongólia, Nikarágua, Polónia, Qatar, Repúblika Cheka, Sri Lanka no Suisa.
Diretór Nasionál ba Asuntu Europa no Áfrika, Zesuino de Oliveira Alves, ba Jornalista iha Palásiu Prezidensiál Nicolau Lobato Bairru Pite Kuarta 18/11/2026 hatete ohin iha Palásiu Prezidensiál Nicolau Lobato, Bairru Pité, Embaixadores sira mai entrega karta kredensial ba Prezidente Repúblika Jose Ramos Horta, no embaixadores sira-ne’e naun-residente.
“Embaixadores sira-ne’e akredita ba Timor-Leste, maibé hela iha nasaun besik hanesan Vietname, Singapura, Indonézia no Austrália”, dehan Zesuino.
Nia esplika katak hosi embaixadores na’in 13 ne’e, na’in 12 iha ona relasaun diplomátika ho Timor-Leste, enkuantu ida mak foin hahú akreditasaun.
Nasaun hanesan Sri Lanka no Nikarágua tama iha prosesu akreditasaun diplomátika foun, ne’ebé hatudu vontade atu hametin relasaun no dezenvolve kooperasaun ho Timor-Leste.
Zesuino hatutan katak, iha enkontru ho Prezidente Repúblika, kada embaixador hatudu kompromisu atu hametin relasaun diplomátika no buka oportunidade foun iha área kooperasaun.
Ba nasaun sira ne’ebé iha ona relasaun diplomátika, sira hakarak reforsa ligasaun existente no esplora área kooperasaun foun. Enkuantu nasaun sira ne’ebé foin akredita, sira mós hatudu interese atu dezenvolve parseria ho Timor-Leste.
Zesuino manifesta esperansa katak, akreditasaun embaixadores foun sei lori benefísiu ba relasaun bilateral, liuliu ho Nikarágua, ne’ebé iha ona relasaun istórika ho Timor-Leste durante luta ba restaurasaun independénsia.
Timor-Leste no Nikarágua estabelese relasaun diplomátika iha tinan 2007. Maski nune’e, foin agora mak Nikarágua akredita nia embaixador ba Timor-Leste.
Nia mós afirma katak, embaixadores sira iha interese atu esplora no hametin kooperasaun bilateral iha futuru.
(eme)






