BAUCAU, STLTIMORLESTE.com – Erozaun neebe afeta ba estrada nasional diresaun Baucau-Lautem iha area baliza entre Suku Caibada Macasa’e no Buruma, Postu Administrativu Baucau Vila, Munisipiu Baucau, monu no ameasadu atu kotu, kauza husi sendimentasaun.
Tuir Tenkniku Destakadu Obras Publikas Munisipiu Baucau, Mateus Freitas aprezenta, hafoin estrada nasional diresaun Lautem-Baucau neebe amesadu kotu iha area baliza entre Suku Caibada Macasa’e no Buruma nian, tanba monu, parte tekniku destakadu Obras Publikas too ona terrenu haree kondisaoens sira, iha neebe nota estrada refere monu, kauza husi sendimentasaun, tanba bee dalan iha estrada okos.
“Tuir ami nia observasaun iha fatin neebe bee dalan entaun balu sentimentasuan nakonu entaun efeitu husi sira nee bee la lao rai book aan, tanba parte estrada nian saluran mos sendimentasaun nakonu hela entaun bee la lao afeta ba estrada,” hateten Mateus ba STL iha nia knaar fatin Uatulete Baucau, Sesta (19/06/2026).
Nia informa, aliende sendimentasaun iha area refere mos estrutura rai mamar, maibe momentu implementasaun projetu reabilitasaun estrada refere la konstrui moru protesaun, nunee afeta estrada atual monu ho distansia metru 50 too 100.
Nia sublina, kondisaun estrada refere parte tekniku destakadu Obras Publikas Munisipiu Baucau relata ona ba Nasional atu halo reabilitasaun, maibe sei hein prosesu topografia molok implementa servisu iha terrenu.
“Pedidu ami hatama ona hein ekipa nasional tun mai halo topografia depois halo dezenha ba konstrusuan permanente hodi proteje ita nia estrada nee,” Mateus fundamenta
Nia dekalara, provizoriu estrada refere kontinua loke ba transporte publiku no privadu asesu, tanba hafoin estrada refere monu liu husi koordenasaun entre tekniku destakadu Obras Publikas ho kompanhia Jova Constraction halo ona ateru kiik ba estrada refere hodi garante movimentasaun kontinua lao diak.
Maibe husu ba motorista sira husi transporte publiku no privadu atu mantein lao ho kuidadu no kalma iha area refere nunee labele afeta ba kondisaun seluk.
(tom)
