DILI, STLTIMORLESTE.com – Estudantes primeiru ano iha Ensinu Baziku Filial (EBF) Vila-Verde, Munisípiu Dili, to’o agora seidauk iha kaderneta eskolar.
Kestaun ne’e hato’o husi Kordenadora Ensinu Baziku Filial (EBF) Vila-Verde, Josefina Maia, ba STL iha nia fatin servisu, Segunda nee (14/09/2026).
Josefina Maia esplika katak, eskola atualmente seidauk iha kaderneta eskolar suficiente, no sentral Farol mak halo ona pedidu fali ba Servisu Edukasaun Munisípiu Dili.
“Hau hanoin kona-ba kaderneta eskolar, agora ami laiha duni kaderneta. Maibé, ami husu ona ba sentral Farol atu halo pedidu fali ba Edukasaun Munisípiu Dili. Husi Munisípiu mak sei fó total kaderneta tuir númeru estudante sira ne’ebé iha, liuliu estudante primeiru ano ne’ebé to’o agora seidauk iha kaderneta eskolar,” nia afirma.
Nia hatutan katak, sentral Farol halo ona pedidu ba Ministériu Edukasaun (ME), no agora eskola hein de’it kaderneta sira to’o atu bele distribui ba estudante sira ne’ebé seidauk hetan.
Tuir nia, kaderneta eskolar importante atu ajuda eskola no inan-aman sira acompanha dezenvolvimentu no rezultadu estudante sira, husi primeiru ano to’o sestu ano.
“Kaderneta ne’e bele responde ba ami nia estudante primeiru ano ne’ebé seidauk iha kaderneta eskolar, no bele responde mós ba estudante sira husi primeiru ano to’o sestu ano,” nia dehan.
Nia mos hatete katak, estudante balun iha ona kaderneta, maibé balun seidauk iha. Tuir nia, númeru estudante ne’ebé seidauk iha kaderneta bele konfirma liu husi rejistu eskola.
Enkuantu, estudante Lidia Menezes dehan nia iha ona kaderneta eskolar no eskola prienxe ona nia valor sira.
“Hau nia kaderneta eskolar iha ona, no husi eskola prienxe ona ami nia valor. Maibé, estudante balun seidauk iha kaderneta, no eskola mak hatene liu númeru estudante sira ne’ebé seidauk iha,” nia esplika.
(jac)
