DILI, STLTIMORLESTE.com – Prosesu ezame nasionál ba estudante finalista sira iha eskola sira Munisípiu Manatuto lao di’ak no kontroladu, tanba Servisu Edukasaun Munisipál (SEM) kontinua halo monitorizasaun no simu informasaun husi eskola sira.
Diretór Servisu Edukasaun Munisipál Manatuto, Luis Antonio Soares hatete ba STL liuhusi telefone, Kuarta-feira (21/10/2026), katak prosesu ezame nasionál iha munisípiu ne’e, hahú husi loron dahuluk to’o agora, lao tuir prosedimentu no manual ezame nasionál ne’ebé estabelese.
“Ezame nasionál hahú husi loron primeiru to’o agora lao ho di’ak. Ezame iha eskola sira iha Manatuto tomak lao di’ak, tanba tuir nafatin manual ezame nasionál. Realizasaun ezame ba loron ohin mós lao ho di’ak hanesan baibain,” nia esplika.
Nia hatutan katak, tuir informasaun ne’ebé SEM simu husi eskola sira, prosesu ezame lao ho kontrolu di’ak. Maski nune’e, iha estudante na’in rua ne’ebé presiza tuir fali ezame iha faze tuirmai.
“Laiha failansu ruma iha ezame. Tuir informasaun ne’ebé ami simu husi eskola sira, ezame lao ho di’ak no estudante ida-idak partisipa iha ezame,” nia afirma.
Enkuantu ne’e, Diretór Servisu Edukasaun Munisipál Liquiça, Julio da Silva, mós afirma katak prosesu ezame nasionál iha munisípiu ne’e lao ho di’ak, tanba ekipa edukasaun munisipál kontinua halo monitorizasaun iha eskola sira.
Nia hatete katak, estudante finalista na’in 2.931 husi nivel ensinu baziku, ensinu sekundáriu tékniku-vokasionál no ensinu sekundáriu jerál mak partisipa iha ezame nasionál iha Munisípiu Liquiça tinan ida-ne’e.
“Ezame nasionál iha eskola sira iha Munisípiu Liquiça lao ho di’ak. Hahú husi loron dahuluk, ezame lao ho di’ak tanba ami halo monitorizasaun ba eskola sira,” nia esplika.
Julio da Silva aumenta katak, Ministériu Edukasaun (ME), liuhusi SEM, kontinua monitoriza ezame nasionál no ezame lokál ba estudante finalista sira, atu asegura katak estudante sira tuir prosesu ezame tuir regra ne’ebé estabelese.
“Profesór vijilante sira kontinua kontrola estudante iha sala ezame ida-idak. Hafoin ezame nasionál, estudante sira sei kontinua kedas ho ezame lokál,” nia afirma.
Iha parte seluk, Diretór Servisu Edukasaun Munisipál Bobonaro, Miguel Freitas, hatete katak estudante finalista sira iha munisípiu ne’e mós tuir ezame nasionál ho di’ak, tanba eskola ida-idak halo ona preparasaun molok ezame hahú.
“Ami kontinua kontrola ezame nasionál iha eskola sira, no prosesu ezame lao ho di’ak hanesan baibain. Molok ezame hahú, eskola ida-idak halo preparasaun no forma ekipa ne’ebé responsavel ba asuntu ezame,” nia haktuir.
(jac)
