DILI, STLTIMORLESTE.com – Selebrasaun aniversariu Bombeirus Timor Leste ba dala 25, Diretor Nasional Bombeirus, Anival Paulo Maia hateten, bombeirus eziste tinan barak ona maibe nafatin lao iha dezafiu nia laran.
Diretor Nasional nee hateten, hanesan instituisaun neebe mak eziste, durante nee korpu bombeirus sira servisu iha risku nia laran, nunee presija nai ulun sira atu tau matan no presiza iha estatutu ka rezime espesial ba sira, tanba sira nia srevisu iha risku nia laran.
“Dezafiu neebe mak bombeirus enfrenta loron ba loron servisu iha risku nia laran, nee duni dezafiu neebe mak ami iha, ami presiza saida mak legal, hanesan instituisaun neebe mak eziste presiza tau matan ho dignu no fo importansia ba bombeirus sai profisional liu tan hodi ezerse sira nia funsaun iha territoriu tomak,” hateten Diretor Nasional Bombeirus, Anival Paulo Maia iha kaikoli, Segunda (26/05/25).
Dirijenti nee salienta katak, dezafiu neebe mak iha presiza legal ida mak estatutu, tanba nee ezije ba Governu hodi bele tau konsiderasaun ba estatutu bombeirus nian, nunee ba futuru bombeirus ida nia membru hetan dezastre bele hetan tratamentu ida neebe mak adekuadu tuir estatutu neebe mak iha.
Nia konta katak, dala barak ona korpu bombeirus sira ezerse nia servisu hodi atende ba iha insendiu neebe mak ho ahi boot afeta ba iha sira nia pulmaun no laiha tratamentu dignu no barak mak lakon sira nia vida.
Enkuantu total ba korpu bombeirus neebe mak efetivu iha territoriu Timor laran tomak hamutuk 416 neebe mak destaka iha korpu hotu-hotu iha pelutaun idak-idak, tanba nee bazeia ba evolusaun dezastre nian, nunee presiza aumenta efetivus bombeirus sira atu nunee bele kobre servisu emerjensia sira iha territoriu tomak.
Aleinde nee mos husu atu presiza moderniza ekipamentu sira inklui amenta viatura kada korpus sira, nunee bele kobre nesesidade emerjensia sira.
Iha fatin hanesan, Sekretariu Estadu Protesaun Sivil, Domingos Mariano Reis hateten, dezafiu neebe mak iha laos sai bareira servisu bombeirus nian, maibe sai hanesan lisaun ida atu ba oin bele garante sustentabilidade ba servisu bombeirus nian.
“Dezafiu sim, maibe dezafiu sira nee laos sai bareira ba protesaun Timor Leste no bombeirus atu garante sustentabilidade iha nasaun ida nee,” hateten Sekretariu Estadu Protesaun Sivil, Domingos Mariano Reis.
Governante nee akresenta, dezafiu hirak nee sai hanesan referensia atu bele hadia iha futuru, tanba nee iha tempu barak sei instala tan postu hitu (7) neebe mak iha area risku sira bazeia ba mapamentu.
Domingos sublina, estatutu bombeirus nian daudaun submete ona iha parte juridiku nian, nunee iha tempu badak sei aprezenta ba iha Konselhu Ministru.
“Estatutu ba bombeirus nian sira laos servisu hanesan admisnitrasaun baibain, sira merese atu hetan estatutu ida ba rejime espesial ba sira nia servisu nee, ema bolu dehan lori vida hodi salva vida, tanba nee sira nia misaun nee boot tebes, tanba ida nee mak ita esforsu hela,” hakoni nia.
(EST 3)
