DILI, STLTIMORLESTE.com – Fundasaun Alola partisipa iha Kongresu Mundiál Kankru 2026 iha Hong Kong, hodi fahe esperiénsia kona-ba prevensaun kankru feto.
Representante Fundasaun Alola, Diretora Ezekutiva Maria Guterres no Koordenadór subprograma HALIKU (Ha’u Hili Atu Kura), partisipa iha Kongresu Mundiál Kankru 2026, ne’ebé organiza husi Uniaun ba Kontrolu Kankru Internasionál (UICC) iha Hong Kong, hosi 24 to’o 26 Setembru 2026.
“Kongresu ne’e halibur reprezentante husi 122 nasaun, inklui peskizadór, profisionál saúde, formuladór polítika no organizasaun sosiedade sivíl, hodi fahe esperiénsia no estratéjia kona-ba prevensaun no kontrolu kankru.
Fundasaun Alola liu husi programa HALIKU hato’o esperiénsia kona-ba edukasaun prevensaun, deteksaun sedu, akompañamentu pasiente no apoiu ba feto Timoroan ne’ebé enfrenta kankru,” dehan nia liu husi komunikadu imprensa neebe STL asesu husi media Fundasaun Alola,Kuarta (30/09/2026).
Programa HALIKU, ne’ebé inisia husi fundadóra Fundasaun Alola, Kirsty Sword Gusmão, hala’o ona atividade sensibilizasaun kona-ba kankru feto liu tinan 12, inklui akompañamentu pasiente no formasaun ba profisionál saúde lokál.
Reprezentante ekipa HALIKU, Pasquela Barreto, hatete partisipasaun iha kongresu ne’e fó oportunidade atu fahe realidade feto Timor-Leste sira ne’ebé enfrenta kankru.
“Ami-nia prezensa iha Kongresu Mundiál Kankru 2026 la’ós de’it atu aprende esperiénsia globál, maibé mós atu amplifika lian feto Timoroan sira ne’ebé luta hasoru kankru,” dehan Pasquela.
Durante kongresu loron tolu, delegasaun Fundasaun Alola aprezenta E-Poster ho títulu “Co-Designing for Equity: Gender Equality, Disability and Social Inclusion (GEDSI) Workshop advancing equitable cervical screening and preventative treatment in Timor-Leste.”
Delegasaun mós partisipa iha sesaun kona-ba Patient Navigation for Chinese Population and Across the World, ne’ebé envolve Global Chinese Breast Cancer Foundation, Flinders University no American Cancer Society.
Iha enkontru paralelu, ekipa HALIKU-Alola ko’alia ho reprezentante UICC, EPICC no organizasaun husi Fiji, Papua-Nova Guiné no Vanuatu kona-ba kooperasaun ba eliminasaun kankru servikál iha rejiaun Indo-Pasífiku.
Delegasaun mós halo enkontru ho Pink Drive husi Áfrika, Ranjit Survivor Breast Cancer husi Malaysia Cancer Society no Kristen McComb husi American Cancer Society.
Pasquela hatete, sesaun kona-ba kankru feto no patient navigation fó perspetiva foun ba ekipa HALIKU atu bele konsidera iha programa sira iha Timor-Leste.
Nia mós hatete partisipasaun iha kongresu ne’e loke oportunidade atu haluan rede serbisu ho organizasaun no kolega husi nasaun seluk.
“Ponto xave husi ha’u-nia esperiénsia mak oportunidade atu haluan rede serbisu ho kolega sira husi nasaun seluk, tanba ligasaun ne’e bele sai baze ba parseria no kolaborasaun iha futuru,” dehan Pasquela.
Fundasaun Alola konsidera partisipasaun iha kongresu ne’e hanesan oportunidade atu hametin kooperasaun internasionál no fahe esperiénsia Timor-Leste kona-ba prevensaun, deteksaun sedu no apoiu ba sobrevivente kankru.
(dom)
