DILI, STLTIMORLESTE.com – Komisária Komisaun Rekrutamentu no Selesaun ba Juiz Supremu Tribunál Justisa no Tribunál Rekursu, Carmelita Moniz, garante katak Konsellu Superior Magistratura Judisiária (KSMJ) sei halo nomeasaun ba juíz sira ne’ebé sei servisu iha Supremu Tribunál Justisa (STJ) ho imparsiálidade no laiha konflitu interese.
Carmelita hateten katak, transparénsia iha prosesu rekrutamentu sei asegura liuhosi publikasaun rezultadu, inklui klasifikasaun husi juri, atu públiku bele asesu informasaun kona-ba kandidatu sira ne’ebé aptu ka la aptu.
“Ema hotu ko’alia kona-ba transparénsia no ejije transparénsia. Transparénsia mak bainhira rezultadu públika, inklui rezultadu husi juri. Ida ne’e tau iha sentru Formasaun Jurídiku Judisiária atu ema hotu bele asesu no haree kandidatu ida ne’ebé pasa ka aptu, no kandidatu ida ne’ebé la pasa ka la aptu. Públiku iha asesu ba faze hotu,” Carmelita hateten ba jornalista sira iha konferénsia iha edifísiu Supremu Tribunál Justisa, Kolmera, Sesta (02/10/2026).
Carmelita esplika katak, prosesu nomeasaun husi KSMJ ba kandidatu sira ba STJ bazeia ba klasifikasaun husi juri.
Ba juíz no juíza, iha kandidatu na’in neen, no sira sei klasifika hosi primeira to’o klasifikasaun ikus, tuir rezultadu avaliasaun husi juri.
Enkuantu ba Prokuradór Repúblika ka membru Ministériu Públiku, iha kandidatu na’in tolu, ne’ebé mós sei klasifika tuir rezultadu avaliasaun: primeira, segundu no terseiru.
Ba jurista rekoñesidu ho méritu, kandidatu na’in haat sei konkore no sei hetan klasifikasaun hosi primeira, segundu, terseiru to’o kuartu.
Carmelita hateten katak, iha etapa ikus, KSMJ sei halo nomeasaun tuir regra no klasifikasaun ne’ebé hetan hosi kandidatu sira.
“Ikus liu, Konsellu sei nomea juíz na’in haat, jurista rekoñesidu ho méritu na’in ida no Prokuradór Repúblika na’in rua. Karik Prokuradór Repúblika na’in tolu la liu, Prokuradór Repúblika na’in rua sei prenxe vaga, tuir sira-nia valór ne’ebé di’ak,” nia dehan.
Nia hatutan katak, karik jurista rekoñesidu ho méritu na’in haat la pasa, vaga sira sei prenxe hosi kandidatu Prokuradór Repúblika, tuir sira-nia rezultadu no valór.
“Maibé ba juíz de carreira, lae. Tuir lei, juíz na’in haat tenke prenxe vaga ne’e,” Carmelita hateten.
Iha fatin ketak, Jurista Sergio Dias Quintas dehan, teste nee ho rigor atu Juiz neebe ba tur iha STJ, tenke ho valor neebe diak.
“Hau hanoin teste ho rigor, atu Juiz neebe sei ba tur iha STJ iha valor neebe diak, atu lori sektor justisa lao ba oin,” dehan nia.
Hatutan tan, ohin loron ema barak sei prekupa ho rekrutamentu nee, maibe tau konfiansa ba iha juri no KSMJ fiar katak, sira sei halao servisu ho diak atu nomeia Juiz tuir valor neebe iha.
(ter)
