DILI, STLTIMORLESTE.com – Gabinete Apoiu Sosiedade Civil (GASC) nafatin iha komitmentu apoiu atividade sosiedade sivil sira neebe mak rejistu ona iha Ministeriu Justisa (MJ).
Kestaun nee hatoo husi Adjunta Gabinete Apoiu Sosiedade Civil, Yasinta Lujina ba STL iha Delta Nova Kuarta nee (28/05/2025) hatete, GASC nafatin iha komitmentu hodi apoiu sosiedade sivil neebe mak rejistu ona iha Ministeriu Justisa ho programa importante sira ba benefisia sira.
“Gabinete Apoiu Sosiedade Civil nee gabinete neebe apoiu ba inisiativa sira neebe mai husi sosiedade sivil, nee signifika katak organizasaun sira neebe legalmente sira rejista iha Ministeriu Justisa hanesan fundasaun asosiasaun ka organizasaun hotu saida deit bele organizasaun Direitus Umanus, organnizasaun juventude kualker sira iha oportunidade bele asesu ba fundus neebe gabinete iha orsamentu subvensaun publiku nia,” katak Adjunta GASC.
Adjunta Gabinete Apoiu Sosiedade Civil hatete, nafatin apoiu inisiativa sira neebe mai husi sosiedade sivil liga ho nesesidade sira neebe komunidade sira iha.
“Dala barak ami la halo programa neebe espesifiku ezemplu ba feto maibe ita iha programa sira neebe liga ba oinsa atu alkansa objetivu neebe estadu iha, iha neeba iha programa 4 neebe ita iha hanesan edukasaun sivika, promove boa Governasaun, empoderamentu komunitaria nomos apoiu sira ba iha organizasaun komunitaria nia, sira neebe mai ho inisiativa sira nee otomatikamente sira tenke iha benefisiariu sira ka komunidade neebe atu simu benefisiu husi programa sira nee tenke iha feto mane labarik enjeral komunidade tomak maibe idak-idak ho nia espesifiku,” katak nia.
Nia hatete, sira mos konsidera feto no enklusividade ka asuntu inkluzaun sosial los iha neeba no apoiu mos ba organizasaun feto sira neebe liu-liu foka ba empoderamentu ba feto sira, nomos organizasaun sira ema ho defisiensia nomos komunidade ho LGBT no seluk tan.
Nunee mos Diretor Nasional Dezenvolvimentu Igualdade Jeneru husi SEI, Jose do Rosario de Carvalho hatete, SEI mos nafatin iha komitmentu atu suporta atividade importante husi Feto Prontu Lidera .
“SEI nafatin iha komitmentu atu suporta orsamentu ba ekipa Feto Prontu Lidera nomos iha komitmentu oinsa estabelese nia atividade sira fo formasaun ba lideransa partidu politiku sira no feto iha partidu politiku sira iha nasional no munisipiu sira para oinsa iha preparasaun aban bainrua iha atividade importante iha parte Governu inan feton sira ba iha neeba ho kualidade,” katak nia.
Nia hatutan, SEI nafatin komitementu atu halo programa formasaun no kapasitasaun sira liu husi partidu politiku sira para oinsa estabelese preparasaun aban bainrua ho kualidade.
(eme)
