DILI, STLTIMORLESTE.com – Prezidente Komisaun Rekrutamentu no Selesaun ba Juiz Supremu Tribunál Justisa no Tribunál Rekursu, Avelino Coelho hateten katak, juíz dezembargadór na’in haat iha Tribunál Rekursu hato’o pedidu ba Komisaun Rekrutamentu atu garante sira bele kontinua hala’o servisu iha sira-nia fatin orijinál, bainhira sira la hetan vaga iha Supremu Tribunál Justisa (STJ).
Avelino Coelho hateten katak, pedidu ne’e iha baze legál, tanba Lei Organizasaun Judisiária prevê katak juíz dezembargadór sira ne’ebé atualmante servisu iha Tribunál Rekursu, bainhira kandidata ba vaga iha STJ no la hetan nomeasaun, bele kontinua ka fila fali ba sira-nia fatin servisu iha Tribunál Rekursu.
“Lei Organizasaun Judisiária ko’alia klaru katak, bainhira komisaun fó sai avizu ba konkursu, juíz dezembargadór sira atual iha Tribunál Rekursu tenke deklara katak sira aseita. Maibé, bainhira la pasa ba vaga iha Supremu Tribunál, sira nafatin bele halo kna’ar iha Tribunál Rekursu,” Avelino Coelho hateten ba jornalista sira iha edifísiu Supremu Tribunál Justisa, Kolmera, Sesta (02/10/2026).
Nia esplika katak, tuir Lei Organizasaun Judisiária, juíz sira iha Tribunál Rekursu ne’ebé kandidata ba vaga iha STJ tenke halo deklarasaun.
“Buat ne’e iha enquadramentu legál. Depois sira tuir konkursu ba Supremu Tribunál Justisa, karik sira la liu, sira-nia fatin servisu nafatin iha Tribunál Rekursu.
Ba juíz sira seluk ne’ebé kandidata maibé la liu, sira mós bele fila fali ba instánsia ne’ebé sira mai hosi, hanesan juíz sira mai hosi Tribunál Primeira Instánsia no Tribunál Rekursu. Sira bele fila fali ba sira-nia fatin servisu uluk. Ne’e la’ós problema, tanba iha baze legál,” nia dehan.
Avelino Coelho subliña, katak medida ne’e la’ós forma ida atu fasilita ema espesífiku, maibé bazeia ba dispozisaun iha lei.
Tuir informasaun neebe iha, Juiz dezembargadór na’in haat ne’ebé hato’o pedidu maka hanesan, Juiz Deolindo dos Santos, Duarte Tilman, Juíza Jacinta Correia no Juíza Natercia Gusmão.
(ter)
