DILI, STLTIMORLESTE.com – Prezidente Republika (PR), Jose Ramos Horta fo doasaun trisiklu kostumariu ba Ema ho Defisiensia (EhD) iha kantina matak.
Prezidente Republika, Jose Ramos Horta entrega bisikleta-roda tolu modifikadu tuir pedidu ba Flavio Ramalho, abitante Bairo Pite ho defisiensia fíziku.
Jestu ida nee ho objetivu atu hadia mobilidade signifikativu Flavio nian no apoia nia servisu sira iha nia ofisina soldadura, nunee bele haburas independensia no oportunidade ekonomika neebe boot liu.
Bisikleta roda tolu adaptadu ho valor total US$ 2,250, kompostu husi kustu US$ 1,700 husi veíkulu baze no adisional US$ 450 ba modifikasaun nesesariu sira. Alterasaun sira nee inklui adapta kuadru, monta pneu apropriadu sira, no asegura katak veíkulu nee hatan ba Flavio nia nesesidade espesífiku sira. Ida nee mak instansia daruak husi apoiu diretu neebe Flavio simu husi Prezidente Republika, tuir fundu ida uluk ho US$ 1,000 neebe ajuda estabelese nia atividade soldadura nian no apoia nia grupu.
Iha biban nee Flavio ba jornalista iha kantina matak Palasiu Prezidensial Nikolao Lobato, Bairo Pite Kuarta (04/06/2025) hatoo agradese ba Prezidente Republika Jose Ramos Horta tanba bele apoiu ona motorizada ba nia hodi tulun nia hodi halo atividade loron-loron nia.
“Dala uluk atan hau hatoo obrigadu barak tanba durante nee hetan apoiu dala barak ona husi Prezidente Republika, hau hetan apoiu hamutuk ida nee ba dala rua, primeiru hau hetan apoiu fundus husi Prezidente US$ 1000 halo resiklajen solda no hola bazu aifunan sira no seluk tan,” dehan Flavio.
Flavio dehan, dala ruma mos uza osan neebe nia hetan hodi hadia fali sasan neebe laiha funsaun hanesan meza ain tohar bele solda fali no agora hetan tan motor apoiu ba dala rua ona.
“Tanba nee hau hatoo agradese tebes tanba dala rua ona hau hetan apoiu husi Prezidente Republika, karik ba futuru hakarak husu Prezidente ajuda mos hau nia kolega sira seluk neebe aat liu hau, ou sira neebe presiza mos apoiu hanesan mos hau, hau nia kolega barak presiza hela maibe sira atu hakat too mai nee laiha ema ruma apoiu atu lori sira mai hasoru Prezidente Republika ,” dehan nia.
Iha biban nee nia mos hatoo agradese ba mana Bella Galhos tanba ho nia bele hasoru malu ho Prezidente Republika, no buat neebe nia mehi bele hetan duni no realiza iha nia moris. “Ho mana Bela nia diak no esforsu ohin loron hau hetan duni motor,” katak nia.
Flavio neebe kria sasan sira husi besi oin-oin hanesan mobiliariu no ai-funan ba dekorasaun, hatoo agradesimentu klean ba apoiu neebe simu. Nia esplika katak bisikleta foun sei ajuda tebes ba transporte material sira too ba kliente sira, no bele jere nia negosiu kiik ho efetivu liu. Flavio mos hatoo nia esperansa katak apoiu hanesan bele habelar ba indivídu sira seluk ho defisiensia neebe hasoru dezafiu komparavel sira hodi buka sira nia moris.
(eme)
