DÍLI, STLTIMORLESTE.com – Prezidente Repúblika (PR), José Ramos-Horta manifesta kontente tanba Parlamentu Nasionál aprova ona proposta OJE 2027 iha faze jeneralidade.
Xefe Estadu hato’o deklarasaun ne’e ba jornalista sira, iha Aeroportu Internasionál Prezidente Nicolau Lobato, Komoro, Dili, Tersa (17/11/2026).
Ramos-Horta afirma katak, nia sei kontinua akompaña prosesu orsamentál no promulga diploma ne’e depois simu dokumentu ofisiál, tuir prosedimentu konstitusionál.
“Ha’u kontente tanba OJE pasa ona iha jeneralidade. Depois sei kontinua ba espesialidade,” Prezidente Ramos-Horta dehan.
Nia esplika katak, Prezidénsia Repúblika nia kompeténsia mak haree aspetu konstitusionálidade, la’ós deside alokasaun orsamentu ba ministériu ida-idak.
Prezidente subliña katak, ezekusaun orsamentu no implementasaun programa Governu nian mak responsabilidade Primeiru-Ministru no membru Governu sira.
Ramos-Horta mós hateten katak prosesu ezekusaun infraestrutura dala ruma la’o neineik tanba presiza asegura integridade no legalidade iha prosedimentu administrativu.
Nia temi katak, difikuldade transporte internasionál, importasaun ekipamentu no fornecementu materiál konstrusaun mós bele atraza implementasaun projetu públiku.
Parlamentu Nasionál aprova proposta Lei OJE 2027 iha faze jeneralidade, iha loron 11 Novembru 2026, ho votu a-favór 41, kontra zero no abstensaun 23.
Proposta orsamentál ne’e iha montante globál US$2.568,5 millaun, inklui Administrasaun Sentrál, Rejiaun Administrativa Espesiál Oe-Cusse Ambeno no Seguransa Sosiál.
OJE 2027 uza lema “Hametin Reziliénsia liuhusi Transformasaun: Diversifika Ekonomia ba Futuru Sustentável”, ho prioridade ba dezenvolvimentu ekonomia nasionál.
Prioridade orsamentál inklui infraestrutura, agrikultura, turizmu, edukasaun, saúde, protesaun sosiál no kriasaun oportunidade empregu.
Aprovasaun iha jeneralidade akontese hafoin Parlamentu Nasionál hala’o debate durante loron tolu, hosi 9 to’o 11 Novembru 2026.
Depois aprovasaun ne’e, proposta OJE 2027 kontinua ba faze espesialidade, ne’ebé tuir kalendáriu Parlamentu Nasionál hahú iha 24 Novembru durante loron sanulu.
Iha faze espesialidade, deputadu sira sei analiza no diskute detallu alokasaun orsamentál ba ministériu no instituisaun públika sira.
Depois remata diskusaun espesialidade, Parlamentu Nasionál sei hala’o votasaun finál globál antes haruka diploma ba Prezidente Repúblika atu promulga.
(eme)






