DILI, STLTIMORLESTE.com – Prezidente Republika (PR), Jose Ramos Horta hatete, Timor Leste nasaun neebe marka ho valor kristaun.
Prezidente Republika, Jose Ramos Horta hatoo kestaun nee liu husi nia mensajen neebe lee husi Xefe Kaza Sivil, Jesuina Maria F. Gomes iha selebrasaun Konferensia Nasional Movimentu Renovasaun Karizmatika Katolika Timor Leste, iha CCD, Sabadu (22/02/2025).
PR Horta hatoo onra boot no ksolok ba iha Komferensia Nasional husi Movimentu Katoliku Renovasaun Karizmatika Timor Leste nian. Permite hatoo agradesimentu klean ba Movimentu Katoliku Renovasaun Karizmatika Timor Leste nian ba Dioseze Díli, Baukau no Maliana, no mos ba parokia sira hotu neebe reprezenta iha nee, ba sira nia empenhu no dedikasaun hodi habelar fiar no hametin povu nia espiritualidade.
Prezidente Republika hatoo benvindu ba distintu konvidadu sira husi Indonezia, neebe sira nia prezensa enrikese liu tan konferensia ida nee no reforsa lasu amizade entre povu sira.
“Timor Leste nuudar nasaun ida neebe marka klean ho valor kristaun, no iha fiar mak ita hetan forsa atu hasoru dezafiu sira iha ita nia moris, Movimentu Renovasaun Karizmatika Katolika dezempena papel esensial ida atu hamoris fali ita nia espiritualidade no hafoun moris sarani. Ita boot sira-nia serbisu, bazeia ba orasaun no evanjelizasaun, kontribui makaas ba konstrusaun sosiedade ida fraterna no solidaria liu,” katak PR Horta.
PR Horta dehan, Konferensia Nasional ida nee sai hanesan testemunha ida tan ba kompromisu atu hametin komunaun entre sarani sira, promove Kreda nia unidade no hafoun kompromisu ba Kristu nia hanorin sira. Espera katak ida-nee sai momentu ida partilha, reflesaun no kreximentu espiritual nian ba partisipante sira hotu.
Xefe Estadu dehan, vizita istorika Santu Padre nian sai sinal inestimavel ida ba nasaun, hodi hametin fiar no hafoun povu timoroan tomak nia esperansa. Resesaun kaloroza no partisipasaun makaas husi komunidade Katolika hatudu, dala ida tan, kompromisu neebe metin ba valor evanjellu nian.
“Susesu husi vizita ida nee sei la sai posivel sein ita boot sira hotu nia serbisu inkansavel, neebe, ho dedikasaun, zelu no organizasaun ezemplar, garante katak momentu ida-idak neebe ita liu sai memoravel. Misa neebe selebra iha Tasi-Tolu, neebe halibur sarani liu 600.000, nuudar sasin unidade no fiar neebe laiha komparasaun. Obrigado ba imi hotu neebe halo sai posivel esperiensia komunaun no grasa nian ida-nee,” hakotu.
(eme)
