DILI, STLTIMORLESTE.com – Hotel ida iha area Becora, Dili, ne’ebé loloos sai fatin deskansa, maibé deskonfia sai fali infernu ba atividade jogu ilegál no Scam Call Centre, hafoin Polisia Cientifika Investigasaun Kriminal (PCIC) kaer toman sidadaun estranjeiru na’in 16 iha fatin refere.
Operasaun ne’e hala’o hafoin PCIC simu informasaun hosi komunidade no halo monitorizasaun durante loron hirak, ikus mai konsege desmantela rede ne’ebé deskonfia liga ho krime organizadu internasionál.
Hatan ba kazu nee Observadór Polítika, Antonio Magno, konsidera situasaun ne’e alarmante no hatudu fraku kontrolu Estadu nian.
“Hotel iha Becora sai infernu ba jogu ilegál, ne’e hatudu ita-nia kontrolu fraku tebes. Oinsá mak estranjeiru sira bele livre liu hala’o Scam Call Centre iha kapitál laran.” dehan Antonio Magno ba STL, iha Dili, Sesta (02/10/2026).
Nia hatutan katak, se Governu la foti medida seriu, Timor-Leste sei sai paraizu ba mafia internasionál hodi halo atividade ilegál.
“Ne’e la’ós jogu ki’ik. Ne’e krime organizadu transnasionál. Imigrasaun, PNTL, no PCIC tenke servisu hamutuk hodi taka lalais fatin sira hanesan ne’e,” nia hateten.
Iha parte ketak Akademista UNPAZ, Duarte de Carvalho, hatete fenomena hotel sai fatin ba jogu ilegál ne’e hatudu falta, kontrolu rigorozu hosi autoridade lisensiamentu no imigrasaun.
“Se hotel ida bele sai infernu ba jogu ilegál, ne’e sinál katak ita-nia sistema fiskalizasaun fraku. Estadu tenke haree didi’ak sé mak fó lisensa no oinsá mak estranjeiru sira tama mai,” dehan Duarte de Carvalho.
Nia afirna, Governu presiza halo revizaun ba regra kona-ba investimentu no hela fatin ba estranjeiru, atu labele uza Timor-Leste nu’udar baze ba krime sibernétiku no burla internasionál.
Entretantu, kada loron Polísia Nasionál Timor-Leste liu husi PCIC kaer sidadaun estranjeiru ne’ebé hala’o atividade jogu ilegál no Scam Call Centre, ne’ebé hatudu krime hanesan ne’e buras maka’as iha Dili laran no presiza atensaun seriu hosi Governu.
(car)
