AMBENO, STLTIMORLESTE.com — Jestor Postu Administrativu Nitibe, Agustinho Afulit, agradese Autoridade RAEOA tanba lansa programa manutensaun sistema kanalizasaun bee moos iha postu administrativu haat iha Oé-Cusse.
Agustinho hato’o apresiasaun ne’e iha Aldeia Bitila, Suku Beneufe, Postu Administrativu Nitibe, Sabadu (12/09/2026), ho prezensa Prezidente RAEOA, Régio da Cruz Salu, diretór rejionál, administradór sub-rejiaun, autoridade lokál no komunidade.
“Ha’u nu’udar Jestor Postu Administrativu Nitibe, reprezenta povu husi suku lima, agradese ba Governu no Autoridade RAEOA tanba lansa ona sistema manutensaun bee moos iha Postu Administrativu Pasabe, Nitibe, Oesilo no Pantemakassar. Iha Nitibe, manutensaun ne’e sei realiza iha Suku Usi Taku,” dehan Agustinho Afulit ba STL.
Nia hateten, programa manutensaun sistema kanalizasaun bee moos ne’e inklui Postu Oel Bonak iha Postu Administrativu Pasabe, Oelnus iha Oesilo, Oel Tune iha Nitibe no Oetulu iha Pantemakassar.
Lansamentu programa ne’e ba sistema Oelnus, Oesilo, realiza ona iha Sesta (11/09/2026).
Autoridade RAEOA deside halo manutensaun ba sistema kanalizasaun bee moos iha Aldeia Oenoah, Oesilo, tanba komunidade iha área ne’e hasoru difikuldade atu asesu bee moos, liuliu durante tempu bailoron.
Manutensaun Ho Orsamentu US$ 42 Mill
Diretór Serbisu Rejionál Água no Saneamentu RAEOA, Yoseph Ili, iha serimónia lansamentu no tau primeira pedra, dehan manutensaun ne’e importante tanba kada tempu bailoron komunidade iha área rural sira hasoru problema asesu ba bee moos.
“Tinan kotuk ita nia Autoridade RAEOA tau osan hodi halo manutensaun ba sistema kanalizasaun bee moos ne’ebé iha ona. Osan ne’ebé Autoridade RAEOA prevee hodi halo manutensaun ba sistema kanalizasaun bee moos iha postu haat ne’e hamutuk US$ 42.000,” dehan Yoseph Ili.
Nia afirma, manutensaun sistema ne’e espera bele ajuda garante fornecimentu bee moos ba komunidade no hamenus difikuldade asesu bee, liuliu bainhira tempu bailoron.
(jos)
