DILI, STLTIMORLESTE.com – Jestor Postu Administrativu Nitibe, Rejiaun Administrativa Espesial Oecusse-Ambeno (RAEOA), Agustinho Afulit rekonhese katak, tempu bailoron ona povu area remotas iha Nitibe enfrenta bee moos, tanba bee matan balun debitur bee hahu menus, maibe governu nafatin tau matan hodi konserva bee matan sira.
“Hau rekonhese katak, tempu bailoron ona hanesan nee, debitu bee iha bee matan sira hahu menus, maske governu instala ona bee husi bee matan ba tanki no distribui bee ba komunidade sira, maibe laos tanba governu mak la fornese bee moos bá komunidade maibe tempu bailoron ona debitu bee menus ona iha bee matan sira, tanba nee komunidade balun hahu enfrenta bee moos liu-liu iha area remotas sira,” dehan Jestor Postu Administrativu Nitibe, Agustinho Afulit via telefone ba STL, Tersa (04/08/2026).
Nia dehan, liga ba bee moos, maske governu instala ona bee iha fatin-fatin, Autoridade Rejiaun Administrativa Espesial Oecusse-Ambeno (RAEOA) kontinua esforsu atu rezolve problema bee moos bá komunidade sira neebe hela iha area remotas, liu-liu iha foho.
“Mudansa klimatika tinan nee iha Timor Leste, liu-liu ita iha RAEOA sei enfrenta sei El-nino, ida nee sei sai ameasa boot kuandu akontese El-Nino iha tinan nee, sei prezudika bee matan iha gatin barak sei menus bee moos, tanba nee ita garante katak bee matan sira neebe sei fornese bee moos bá komunidade, ita sei proteje,” dehan nia.
Nia dehan, Autoridade RAEOA liu husi nia liman ain iha Postu Administrativu Nitibe ho Xefe Suku sira identifika ona fatin bee matan sira iha suku 5 no kanaliza ona bee bá komunidade sira, maibe sei akontese El-Nino, sei prezudika bee matan iha area remotas liu-liu iha foho sei enfrenta bee moos.
“Hau husu bá inan aman sira iha Oecusse, liu-liu iha Nitibe, karik atu lere ai halo toos, labele estraga ai laran tuan sira neebe bee moris, maske fatin nee ita boot nia toos fatin, tenke dook 50 metru ou 100 metru, tanba kuandu ita lere ai laran tuan sira neebe besik bee matan, kuandu la iha ona bee, ita rasik mak sofre hodi buka fali bee iha fatin dook,” dehan nia.
Iha okaziaun nee, Xefe Suku Usitaku, Hilario Colo dehan, tempu bailoron ona iha Suku Usitaku komunidade balun hahu enfrenta bee moos kauza husi bee matan sira iha fatin balun hahu menus ona.
“Hau nia komunidade hahu enfrenta ona menus bee moos tanba debitu bee hahu menus ona, daudaun tama ona tempu bailoron, governu kanaliza ona bee bá povu maibe debitu bee mak hahu menus,” afirma nia.
Antes nee Diretor Rejional Servisu Agua, Saneamentu no Ambiental, Yoseph Ili dehan, governu nafatin esforsu hodi hadia kanu kanalizasaun bee moos inklui halo perfurasaun bee no kanaliza bee moos bá povu, tanba nee iha fatin balun neebe enfrenta bee moos, governu prepara kareta bee tanki 4 Oecusse, atu responde povu neebe presiza bee, povu hatama pedidu, governu sei atende.
(jos)
