DILI, STLTIMORLESTE.com – Jesus konvida ema neebe sente moris nee todan, tanba hasoru dezafiu oin oin iha moris no kolen besik ba nia.
Lia hirak nee hatoo husi Padre Paul Kerans, SVD ba STL, Sesta (17/07/2026) hatete, evanjelhu husi saun Mateus 11 :28- 30 Jesus konvida ema neebe iha moris sente todan no kolen atu besik ba Jesus.
“Evanjelhu ohin nian konaba Jesus nia konvite, mai besik hau, imi hotu neebe kole no todan. Iha kontestu orijinal, Jesus koalia ba sira neebe sente todan tanba interpretasaun rigorozu konaba ukun fuan Judeu nian neebe autoridade relijioza sira koko atu fo ba sira. Maibe, Jesus nia konvite nee dirije ba ita hotu neebe sente todan tanba razaun saida deit,” dehan Padre Paul.
Padre haktuir tan katak bainhira rona konvite husi Jesus ba ema idak, idak mos presiza halo refleksaun ba aan, hodi hatan ba promesa neebe nain halo ba ema idak idak.
“Bainhira ita rona Jesus nia konvite. Mai besik Hau, no ita hatan, ita mos rona promesa neebe Nia halo mai ita. Hau sei fo kmaan ba imi. Liafuan deskansa tuir lolos refere ba esperiensia hetan oazis ka refresku ida hafoin viajen naruk ida liu hosi raifuik. No esperiensia ida nee hetan iha Salmo, “Nai maka hau nia Bibi Atan” Nia lori hau ba bee hakmatek nia sorin no fo kmaan ba hau nia klamar,” dehan Padre.
Maromak promete katak se ema mai hasoru Nia, ema sei esperiensia renovasaun espíritu nian no plenitude moris nian neebe boot liu. No moris nee nia plenitude maka deskansa rohan laek, neebe hein liu fali moris rai nian ida nee.
Jesus koalia konaba nia aan nuudar ema neebe laran diak no haraik aan neebe refreska no fo moris duni ba sira neebe kole no todan.
Bibi atan kreda Katolika nee dehan klaru, Jesus nia dalan presiza sakrifísiu. Maibe Jesus sujere katak ida nee laos todan tanba nia lao iha dalan ida nee hamutuk ho ema. Nia bolu ema atu lao iha ninia dalan ho forsa neebe ema simu husi relasaun pesoal neebe klean ho ema ida-idak.
Tanba nee Padre husu ema idak idak neebe hasoru dezafiu problema iha moris labele sente mesak, maibe koko hamutuk ho Jesus, katak bainhira sente moris nee todan liu ona buka Maromak no hatoo ba Maromak saida mak ita hasoru.
Bainhira ema hatoo problema no dezafiu ho esperansa no fiar metin iha Jesus fiar ba katak Jesus sei fo solusaun neebe diak no sei rejolve problema hotu neebe ema hasoru iha moris loron ba loron, tanba nee buka hakbesik aan nafatin ba Jesus, no Jesus rasik konvida ema hotu neebe sente todan besik ba nia, sei hetan dalan.
Jesus bolu mai besik Hau, imi sira neebe sente kolen no sente todan, signifika katak bainhira ema ba ho fuan no laran metin ba Jesus sei hetan solusaun, tanba Jesus mak dalan ba moris, no salvanasaun nia nain no buat hotu nia hun no rohan.
(eme)
